ވެލާނާ އިންޓަރނޭޝަނަލް އެއަރޕޯޓް (ވީއައިއޭ) ޑިޕާޗަރ ޓަރމިނަލުން ނެރެގެން ގެންދަން އުޅުނު ޑަސްޓްބިން ކޮތަޅުތަކެއްގައި ސިނގިރޭޓް ކާޓަންތަކެއް ފެނި، އެ މައްސަލައެއް ތަހުގީގު ކުރަން ފަށަައިފިއެވެ. މި މައްސަލަ ތަޙުޤީޤުކުރަމުން ދަނީ ކަސްޓަމްސް އިންނެނެވެ.
މި މައްސަލައިގައި ތުހުމަތުކުރެވެނީ ފުލުހަކަށް ކަމަށް މައުލޫމާތު ލިބިފައިވީ ނަމަވެސް މައްސަލައިގެ ތަޙުޤީޤު ކުރިއަށް ދާތީ މިވަގުތު އެއްވެސް މަޢުލޫމާތެއް ހާމަކުރެވެން ނެތް ކަމަށް ކަސްޓަމްސްގެ މީޑިއާ އޮފިޝަލަކު ވަނީ ވިދާޅުވެފައެވެ.
ސިނގިރޭޓްގެ އަގު ބޮޑުކޮށް، ވޭޕް ފަދަ ތަކެތި މަނާކުރި ފަހުން، ކަޅުބާޒާރުގައި ސިނގިރޭޓްގެ ވިޔަފާރި އިތުރުވަމުންދާކަން ވަނީ ފާހަގަކުރެވިފައެވެ. އެކި ގޮތްގޮތުން ސިނގިރޭޓް ވަގަށް އެތެރެކުރުމާއި ސިނގިރޭޓާއި ވޭޕުގެ ވަގު ވިޔަފާރިކުރުން ދުވަހެއް ދުވަހަކަށް ދަނީ އިތުރުވަމުންނެވެ.
މީގެ ކުރިން ވެސް ދެ ބޮންޑެޑް ވެއަރހައުސްއަކުން ގަވާއިދާ ޚިލާފަށް ސިނގިރޭޓް ކޭސްތަކެއް ނެރުނު މައްސަލައެއް ވަނީ ފެންމަތިވެފައެވެ. އެ މައްސަލައިގައި ބޮންޑެޑް ވެއަރހައުސްތައް ހިންގަމުންދިޔަ ކުންފުނި ވަނީ ބޮޑު އަދަދަކުން ޖޫރިމަނާކޮށްފައެވެ.