ޢީދު ބަންދާ ދިމާކޮށް، އެއެއަރލައިންގެ ސީޕްލޭން ދަތުރުތައް ބ. ފުޅަދޫއަށް ކޮންމެ ހަފްތާއެއްގެވެސް ދެދުވަހު ކުރާނެ ކަމަށް މޯލްޑިވިއަނުން ހާމަކޮށްފިއެވެ. މި ދަތުރުތައް ފެށުމަށް ހަމަޖެހިފައި ވަނީ މިމަހުގެ 31 ވަނަ ދުވަހުންނެވެ
މޯލްޑިވިއަންއިން މަޢުލޫމާތު ދެއްވާފައިވާ ގޮތުގައި، މި ދަތުރުތައް ކުރާނީ ކޮންމެ ހަފްތާއެއްގެވެސް ބުރާސްފަތި އަދި ހޮނިހިރު ދުވަހުއެވެ. މާލެއިން ފުޅަދޫއަށް ކުރާ ސީޕްލޭން ދަތުރުގެ ދިގުމިނަކީ 25 މިނެޓެވެ.
މި ދަތުރުތަކާއެކު ބ. އަތޮޅަށް އެއެއަރލައިނުން ކުރާ ދަތުރުތައް ފުޅާވެގެންދާނެކަމަށް މޯލްޑިވިއަންއިން ވަނީ ބުނެފައެވެެ. އަދި ބ. ފުޅަދޫއާއި ކައިރީގައި އޮންނަ ބ. ފެހެންދޫ އަދި ބ. ގޮއިދޫއަށްވެސް ދަތުރުކުރަން ބޭނުން ފަރާތްތަކަށް މިއީ ލިބިގެންދާނެ ފަސޭހައެއް ކަމަށްވެސް ފާހަގަ ކޮށްފައިވެއެވެ.
ކޮންމެ އަހަރަކުވެސް ޢީދާ ދިމާކޮށް އެތެރޭގެ އުދުހުންތަކަށް އަންނަ ޑިމާންޑަށް ބެލުމަށްފަހު މޯލްޑިވިއަންއިން ދަތުރުކުރާ މަންޒިލްތަކަށް އިތުރު ދަތުރުތައް ބާއްވަމުންދެއެވެ. މިއަހަރުވެސް އެގޮތުގެ މަތިން ޢީދު ބަންދާއި ދިމާކޮށް ބ. ފުޅަދޫއަށް ސީޕްލޭން ދަތުރުތައް ފެށުމަށް މި ވަނީ ނިންމާފައެެވެ.
މި ދަތުރުތަކަށް ޓިކެޓް ވިއްކަން މިހާރު ވަނީ ފަށާފައެވެ. އިތުރު މަޢުލޫމާތު ހޯދުމަށާއި ޓިކެޓް ގަތުމަށް މޯލްޑިވިއަންގެ ވެބްސައިޓުން ނުވަތަ 24 ގަޑިއިރު ޚިދުމަތްދޭ ކޯލް ސެންޓަރުގެ ނަންބަރު 1671 އަށް ގުޅުމުން ލިބޭނެ ކަމަށް އެއެއަރލައިނުން ވަނީ މަޢުލޫމާތު ދީފައެވެ.