ރާއްޖެއާއި ރާއްޖެއިން ބޭރުގައި މަތީ ތަޢުލީމާއި ތަމްރީން ހޯދުމަށް ދޫކުރާ އަދި ދޫކޮށްފައިވާ ލޯނުތަކަކީ އިސްލާމީ ޝަރީޢާއާ އެއްގޮތްވާ ލޯނުތަކަކަށް ހެދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަންގަވައިފިއެވެ. މިކަން އެމަނިކުފާނު ހާމަކުރެއްވީ މީޑިއާ ޕްލެޓްފޯމް "އެކްސް" ގައި ކުރެއްވި ޕޯސްޓެއްގައެވެ.
މި ބަދަލާ ގުޅިގެން، ލޯނުތަކުން ނަގަމުންދިޔަ 1 ޕަސެންޓްގެ އެޑްމިނިސްޓްރޭޓިވް ފީ އެއްކޮށް އުވާލުމަށް ރައީސް ވަނީ އަންގަވާފައެވެ. އަދި ލޯނުގެ ގޮތުގައި ދޫކުރާ އަދަދުގެ އިތުރުން އެއްވެސް އިތުރު ފީއެއް ނެގުން ހުއްޓާލުމަށްވެސް އިރުޝާދު ދެއްވާފައިވެއެވެ.
މީގެ އިތުރުން، މިހާރު ލޯނު ނަގާފައިވާ ދަރިވަރުންނަށްވެސް މި ލުޔެއް ލިބިގެންދާނެއެވެ. އެގޮތުން، އެ ދަރިވަރުން ދައްކަން ހުރި ފައިސާއިން އެޑްމިނިސްޓްރޭޓިވް ފީ އުނިކޮށް، ލޯނުގެ ޖުމްލަ އަދަދު އަލުން ހިސާބުކުރުމަށް ރައީސް ވަނީ އަންގަވާފައެވެ.
"ރާއްޖެއާއި ރާއްޖެއިން ބޭރުގައި މަތީ ތައުލީމާއި ތަމްރީން ހޯދަން ދޫކުރާ އަދި ދޫކޮށްފައިވާ ލޯނުތަކަކީ، އިސްލާމީ ހަމަތަކަށް ފެތޭ، ޝަރީއާ ކޮމްޕްލަޔަންޓް ލޯނުތަކަކަށް ހެދުމަށް ކަންކަން ތަންފީޒުކުރުމަށް ކަމާބެހޭ ފަރާތްތަކަށް މިއަދު ދަންނަވާފައިވާނެ،" ރައީސް މުޢިއްޒު ވިދާޅުވިއެވެ.
މި ބަދަލުތަކަކީ ސަރުކާރުން ތަޢުލީމީ ލޯނުތައް އިސްލާމީ ޝަރީޢާއާ އެއްގޮތަށް ބައްޓަންކުރުމަށް އަޅުއްވާ މުހިންމު ފިޔަވަޅެއްގެ ގޮތުގައި ފާހަގަކުރެވެއެވެ.