އެމަނިކުފާނުގެ ރިޔާސީ ވަޢުދުފުޅާ އެއްގޮތަށް، ހއ. ކެލާގެ ފަޅުގައި 2 ރިސޯޓު ތަރައްޤީކުރުމަށްޓަކައި، އެ ރަށުގެ ފަޅުތެރެއިން ޖުމުލަ 325.5 ހެކްޓަރު ބިން ކަނޑައެޅުއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.
މި ނިންމެވުމަކީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން ނިންމެވި ނިންމެވުމެކެވެ. މިކަން ހާމަކުރައްވާފައިވަނީ މިއަދު ނެރުއްވި ޤަރާރުގައެވެ. އަދި ތިލަދުންމަތީ އުތުރުބުރީ ކެލާގެ އިޚްތިޞާޞަށް ގެނައި ބަދަލު ދައްކުވައިދޭ ޗާޓު ޖަދުވަލުކޮށް، މި ޤަރާރު ވަނީ ދިވެހި ސަރުކާރުގެ ގެޒެޓުގައި ޝާއިޢުކުރައްވާފައެވެ.
މިދިޔަ އަހަރުގެ ފެބްރުއަރީ މަހު ރައީސް ކެލަޔަށް ކުރެއްވި ދަތުރުފުޅެއްގައި، އެރަށުގެ ފަޅުތެރޭގައި ރިސޯޓެއް އަދި ދަނޑުވެރިކަމުގެ މަޝްރޫޢެއް ހިންގަވާނެކަމުގެ ޔަޤީންކަން ރައްޔިތުންނަށް ދެއްވާފައިވެއެވެ. “ފަޅު ތެރޭގައި ރިސޯޓް ތަރައްޤީކުރުމުގެ ޕްރޮޖެކްޓަށް ބޮޑު އިސްކަމެއް ދޭނަން. އިކޮނޮމިކް ކައުންސިލްގައި މަޝްވަރާކޮށް އެކަމަށް މަގުފަހިކޮށް، ޙަޤީޤަތަކަށްވާތަން ފެންނާނެ” ކަމަށް ރައީސް އޭރު ވިދާޅުވިއެވެ.
މި މަޝްރޫޢުގެ ސަބަބުން އެ ސަރަޙައްދުގެ ޒުވާނުންނަށް ރަށް ކައިރީގައި ވަޒީފާ އަދާކޮށް އާމްދަނީ ހޯދޭނެ ފުރުޞަތުތައް ފަހިވެގެންދާނެއެވެ. އަދި ކެލާގައި މިހާރު ފަށާފައިވާ ޓުއަރިޒަމް ޒޯންގެ މަސައްކަތްވެސް އަވަސްކުރައްވާނެކަމަށް ރައީސް ވަނީ ވިދާޅުވެފައެވެ.
މީގެއިތުރުން، ކެލާގައި ދަނޑުވެރިކަން ފުޅާކުރުމަށް ޚާއްޞަ ޕްރޮގްރާމެއް ހިންގުމަށްވެސް ވަނީ ރޭވިފައެވެ. ރާއްޖޭގައި އުފައްދާ ބާވަތްތައް ރިސޯޓްތަކަށް ސަޕްލައިކުރެވޭނެ ނިޒާމެއް ޤާއިމުކުރުމަކީ ސަރުކާރުގެ މުހިންމު އަމާޒެއްކަމަށް ރައީސް ވަނީ ފާހަގަކުރައްވާފައެވެ.