ފިޠުރު ޢީދުދުވަހަކީ ގުޅުންތައް ބަދަހިވެ މުޅި މުޖުތަމައުގެ ބައިވެރިވުން އޮންނަ ދުވަހަކަށްވުން މުހިންމު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް ޑރ މުއިއްޒު މިހެން ވިދާޅުވީ ފިޠުރު ޢީދުގެ ހެޔޮދުޢާއާއި ތަހުނިޔާ ރައްޔިތުންނަށް އަރިސްކުރައްވައި ފޮނުއްވި ޚިޠާބުގައެވެ.
މި ފިޠުރު ޢީދު ދުވަހު މަސައްކަތްކުރަންވީ މި ޢީދަކީ ހެޔޮ ފޯރުވުމުގެ ދުވަހަކަށް ހަދަން ކަމަށާއި، ޚާއްޞަކޮށް ކުޑަކުދިންގެ މޫނުމައްޗަށް ހިނިތުންވުން ގެނެސްދޭ ދުވަހަކަށް ހަދަން ކަމަށް ރައީސް ވަނީ އިލްތިމާސް ކުރައްވާފައެވެ. އާއިލާތަކުގެ ގުޅުންތައް ބަދަހިވެ އެއްބަނޑުއެއްބަފައިކަމުގެ ކުލުނުން އާ ރޫޙެއް ލިބޭ ދުވަހަކަށް ހެދުމާއި ޒުވާނުންނާއި އިސްރަށްވެހީންނާއި، މުޅި މުޖުތަމަޢުގެ ބައިވެރިވުން ލިބިފައިވާ ދުވަހަކަށް ޢީދު ދުވަސް ވުން މުހިންމު ކަމަށްވެސް އެމަނިކުފާނު ވިދާޅުވިއެވެ.
ރައީސް ޑރ މުއިއްޒު ވިދާޅުވީ ފިޠުރު ޢީދަކީ ދަރުމައާއި ދީލަތިކަމުގެ މޫސުމެއް ކަމުގައިވާ ރަމަޟާން މަސް ނިމުމަށްފަހު އަންނަ ދުވަހެއް ކަމަށާއި ރޯދަމަހު އަޅުގަނޑުމެން ހިފާ ރޯދައިގެ އިތުރަށް ހެޔޮ ޢަމަލުތައް ގިނަކޮށް، އިސްތިޣުފާރު ކުރުމާއި ދުޢާކުރުން އިތުރުކުރަނީ މި މިންގަނޑުގައި ދެމިތިބުމަށް ޓަކައި ކުރުން މުހިންމު ކަމެއް ކަމަށެވެ.
ޣައްޒާގެ ކުޑަކުދިންގެ ގިސްލުން ހަނދާން ނައްތާނުލުމަށް އިލްތިމާސްކުރައްވަމުން، ފަލަޞްޠީނުގެ އަޚުންނާއި އުޚްތުންނަށް ހެޔޮއެދުމާއި ހެޔޮދުޢާ ދެމެހެއްޓުމަށް ރައީސް ގޮވާލެއްވިއެވެ. އަދި ޢީދު ދުވަހުގެ އެންމެ ޚާއްސަ އަޒުމަކަށް ހަދަންވީ ކުރިއަށް އޮތް ދުވަސްތަކުގައި އަމިއްލަ ނަފްސު އިޞްލާޙުކުރުން ކަމުގައި ވިދާޅުވިއެވެ.
ސަރުކާރުގެ މަޤްޞަދަކީ އިސްލާމްދީނުގެ މަތިވެރި ޝިޢާރުތައް އުފުލުމުގައި ދިވެހިރާއްޖެ ނަމޫނާ ޤައުމަކަށް ހެދުން ކަމަށް ފާހަގަކުރައްވަމުން، ޢީދު ފާހަގަކުރުމުގައި ރަށްރަށް ދިއްލުމާއި ތަކުބީރު ގުގުމާނެހެން އިންތިޒާމުތައް ހަމަޖެއްސުމަކީ މި މަޤްޞަދުގައި ތަޢާރަފުކުރެވުނު ކަމެއްކަން ރައީސް ފާހަގަކުރެއްވިއެވެ.
ޚިޠާބު ނިންމަވާލައްވަމުން ރައީސް މުޢިއްޒު އިސްލާމީ އުންމަތަށް ނަޞްރާއި ރައްކާތެރިކަން ދެއްވުމަށާއި، ދިވެހި ޤައުމަށް ހެވާއި ލާބަ މިންވަރުކުރެއްވުމަށާއި ކުރިއަށް އޮތް އަހަރަކީ ބާއްޖަވެރި އަމާން ތިޔާގި އަހަރެއް ކަމުގައި ލެއްވުމަށް އެދި ދުޢާ ދެންނެވިއެވެ