މިއަދަކީ އިސްރާފުކުރުމާއި ކަންދެއްކުމާއި ބޮޑާވުމެއް ނެތި، ޒީނަތްތެރިވެ ހުވަނދުލައި އުފާ ކުރަންވީ ދުވަސް ކަމަށް މިއަދުގެ ޢީދު ހުތުބާގައި ބުނެފިއެވެ.
1446 ވަނަ އަހަރުގެ ފިޠުރު ޢީދު ހުތުބާގައި ﷲ އަށް ތަޤްވާވެރިވުމަށް ވަޞިއްޔަތްކުރެއްވުމާއެކު، ޢީދު ދުވަހަކީ ތަކުބީރުގެ ދުވަހެއްކަން ފާހަގަކުރައްވައި، މުސްލިމުންގެ ޢީދުގެ ޒީނަތްތެރިކަމަކީ ތަކުބީރުކަން ބަޔާންކުރިއެވެ. އަދި ތެދުވެރި އަޚުވަންތަކަމާއި ކުލުނުވެރި ލޯތްބާއެކު ގާތްތިމާގެ މީހުންގެ މެދުގައި ގުޅުންތައް ބަދަހިކުރުމަށް ނަސޭހަތްތެރިވިއެވެ.
ހުތުބާގައި އިސްލާމީ ޢީދުތަކަކީ ﷲ ޝަރުޢުކުރައްވާފައިވާ ޢީދުތަކެއްކަމާއި، ފިޠުރު ޢީދަކީ ރަމަޟާން މަހުގެ ފަރުޟު އަދާކުރުމާ ގުޅިގެން އަންނަ ޢީދެއްކަން ބަޔާންކުރެއްވިއެވެ. އަދި ޢީދު ދުވަހުގެ އުފާ ހުރިހާ ފަންތިއެއްގެ މީހުންނާ ހިއްސާކުރުމުގެ މުހިންމުކަން ފާހަގަކޮށް ބުނީ ޢީދު ދުވަހު ޒީނަތްތެރިވުމާއި، ހިނައިގަތުމާއި، ރީތި ހެދުން ލުމާއި، ހުވަނދުލުން ސުންނަތްވެގެންވާ ކަންކަމުގައެވެ. ނަމަވެސް އިސްރާފުކުރުމާއި ބޮޑާކަމާއި ކަންދެއްކުން މަނާވެގެންވާކަންވެސް ހުތުބާގައި ފާހަގަކުރިއެވެ.
ހުތުބާގައި މައިންބަފައިންގެ ޙައްޤުތަކަށް ޚާއްޞަ އަހައްމިއްޔަތުކަމެއް ދެއްވައި، މައިންބަފައިންނަށް ހެޔޮކޮށް ހިތުމާއި، އެ ދެ މީހުންނަށް އިޙްތިރާމްކުރުމަށް ގޮވާލައި، މި އުފާވެރި ދުވަހުގައި އިސްލާމްދީނުގެ މަތިވެރިކަން ހަނދާންކޮށް، ދީނާއި ޢަޤީދާ ރައްކާތެރިކުރުމުގެ މުހިންމުކަންވެސް ބަޔާންކުރިއެވެ. މިއަދުގެ ޢީދު ހުތުބާގައި މުސްލިމުންގެ އެއްބައިވަންތަކަމާއި، އެކަކު އަނެކަކަށް އޯގާތެރިވުމުގެ މުހިންމުކަން ފާހަގަކުރުމާއެކު، ދުނިޔޭގެ އެކި ކަންކޮޅުތަކުގައި ޙާލުގައި ޖެހިފައިވާ މުސްލިމުން ހަނދާންކޮށް، އެމީހުންނަށް ދުޢާކުރުމަށް މިއަދުގެ އީދު ހުތުބާގައި ވަނީ ގޮވާލާފައެވެ.
މިއަދުގެ ޢީދު ހުތުބާގައި ރަޙިމުގެ ގުޅުން ދެމެހެއްޓުމުގެ މުހިންމުކަން ފާހަގަކުރަމުން ބުނީ ރަޙިމުގެ ގުޅުން ދަމަހައްޓާ މީހާއަކީ ހަމައެކަނި ހެޔޮކަމުގެ ބަދަލުގައި ހެޔޮކަމެއް ކޮށްދޭ މީހާއެއް ނޫންކަމަށާއި، އެ މީހާއަކީ ރަޙިމުގެ ގުޅުން ކެނޑޭ ހިނދު އެ ގުޅުން ބަދަހިކުރާ މީހާކަމަށެވެ.
ހުތުބާގައި ފަޤީރުންނާއި މިސްކީނުންނަށް ހެޔޮ ފޯރުކޮށްދީ، ޢީދުގެ އުފަލުގައި އެމީހުން ބައިވެރިކުރުމުގެ މުހިންމުކަން ބަޔާންކޮށްދެމުން، ޢީދު ދުވަހުގެ އަދަބުތަކުގެ ތެރޭގައި ހިނައިގަތުމާއި، ރީތި ހެދުން ލުމާއި، ހުވަނދު ލުން ހިމެނޭކަން ފާހަގަކޮށް ބުނީ އިސްރާފުކުރުމާއި، ބޮޑާކަމާއި، ކަންދެއްކުމުގެ ސިފަޖެހިފައިވާ ކަންތައްތައް އިސްލާމްދީނުގައި މަނާކުރައްވާފައިވާ ކަންތައްތައް ކަމަށެވެ.
މީގެއިތުރުން، އިސްލާމްދީނުގެ މުހިންމުކަމާއި، ޤައުމުގެ އިސްލާމީ ޝަޚްޞިއްޔަތު ދެމެހެއްޓުމުގެ މުހިންމުކަން ފާހަގަކޮށް، ޚާއްޞަކޮށް ކުރިއަށް އޮތް ޖީލުތަކަށް އިސްލާމީ ތަރުބިއްޔަތާއި ތަޢުލީމު ފޯރުކޮށްދިނުމުގެ މުހިންމުކަން ވަނީ ބަޔާންކޮށްފައެވެ.
އީދު ހުތުބާގައި މުސްލިމުންގެ އެއްބައިވަންތަކަމާއި، އެކުވެރިކަމުގެ މުހިންމުކަން ފާހަގަކުރައްވަމުން، ހުރިހާ ރުޅިވެރިކަމަކާއި ޙަސަދަވެރިކަމެއް ދޫކޮށްލުމަށް ގޮވާލެއްވިއެވެ. އަދި މައިންބަފައިންގެ ޙައްޤުތައް އަދާކުރުމުގެ މުހިންމުކަން ޤުރުއާނުގެ އާޔަތްތަކާއެކު ބަޔާންކޮށް ބުނެދިނެވެ.
ފިތުރު އީދުގެ ހުތުބާވެސް ނިމުމުގެ ކުރިން ރަސޫލާ ﷺ ގެ މައްޗަށް ޞަލަވާތް ކިޔެވުމުގެ މުހިންމުކަން ހަނދާންކޮށްދީ، އިސްލާމްދީނުގެ އިންސާނީ ޝިޢާރުތަކާއި އަޚްލާޤީ އަސާސްތައް ދަމަހައްޓަން ބާރުއަޅާފައިވެއެވެ.