މަސްތުވާތަކެތި ބޭނުން ކުރުމަށް ދެވި ހިފާފައިވާ މީހުން އަނބުރާ މުޖުތަމަޢަށް ގެނައުމަށާއި، އަދި ރާއްޖޭގެ ރަށްރަށުގައި މަސްތުވާތަކެއްޗަށް މީހުން ހުށަހެޅިގެންދިއުން ހުއްޓުވުމަށް (ވިޔަނުދިނުމަށް) ވަށާޖެހޭ މޮޑެލެއްގެ ތެރެއިން "ގިރިންދާ" ޖަމިއްޔާއިން ކުރަމުންދާ މަސައްކަތަކީ ފުލުހުންގެވެސް ޒިންމާއާއި ވަރަށްބޮޑަށް ގުޅިފައިވާ ބޮޑު ޤައުމީ މަޝްރޫޢެއްގެ މަސައްކަތެއް ކަމަށާއި، އެމަސައްކަތަށް ދިވެހި ފުލުހުންގެ ހުރިހާ ވަޞީލަތެއް ވެސް ފޯރުކޮށްދެވެން އޮތް މިންވަރަކުން ފޯރުކޮށްދެއްވާނެ ކަމަށް ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވެއްޖެއެވެ.
އެމަނިކުފާނު މިހެން ވިދާޅުވި ކަމަށް ‘ހުވަދޫ، ނޫހަށް މަޢުލޫމާތު ދެއްވާފައިވަނީ ‘ގިރިންދާ، ޖަމިއްޔާގެ ބޯޑުގެ ޗެއަރ އަދި މުސްތަޝާރު، މުޙައްމަދު ޝަރީފެވެ.
ފުލުހުންގެ 92 ވަނަ އަހަރީ ދުވަހު "ގިރިންދާ" ޖަމިއްޔާގެ އިސްފަރާތްތަކާއެކު ކޮމިޝަނަރ އޮފް ޕޮލިސް ބޭއްވި ބައްދަލުވުން އޮތީ ގއ.ވިލިނގިލި ކައުންސިލް އިދާރާ ގައެވެ.
މިބައްދަލުވުމުގައި ގއ.އަތޮޅު ކައުންސިލުގެ ރައީސާއި އެއަތޮޅުގެ ބައެއް ރަށްރަށުގެ ކައުންސިލްތަކުގެ ރައީސުންވެސް ބައިވެރި ވެލެއްވިއެވެ. އަދި ސައުތު ޕޮލިސްގެ ކޮމާންޑަރ، އެސިސްޓެންޓް ކޮމިޝަނަރ އޮފް ޕޮލިސް އަޙްމަދު ޝަމީމާއި، ސައުތު ޕޮލިސް ސަބްރީޖަން ކޮމާންޑަރ ރިޝްވީނާ އަޙްމަދާއި، ޑްރަގް އެންފޯސްމެންޓް ޑިޕާރޓްމެންޓުގެ ހެޑް ނާހިދު ޙުސައިން ގެ އިތުރުން ގއ. އަދި ގދ. އަތޮޅުގެ ކޮމާންޑަރުންނާއި، ތިނަދޫ ސިޓީ ޕޮލިސް ކޮމާންޑަރވެސް މިބައްދަލުވުމުގައި ބައިވެރިވެލެއްވިއެވެ. މީގެއިތުރުން މިމަސައްކަތަށް އަމިއްލަގޮތުން ހޭދަކޮށް އެހީތެރިވެދެއްވާ ގއ.ދާންދޫ ސަވެޔާ އިންވެސްޓްމެންޓުގެ ފަރާތުން އެކުންފުނީގެ މެނޭޖަރ ޝަހީބު އަޙްމަދު ވެސް ބައިވެރިވެލެއްވިއެވެ.
މިބައްދަލުވުމުގައި އޭ.ސީ.ޕީ އަޙްމަދު ޝަމީމް ދެއްކެވި ވާހަކަ ފުޅުގައި މިމަސައްކަތް ރާއްޖޭގެ ހުރިހާ ރީޖަނަކަށް ވާޞިލް ކޮށްދިނުމަށްޓަކައި "ގިރިންދާ" ޖަމިއްޔާއާއި ރާއްޖޭގެ އެހެން ހުރިހާ ޕޮލިސް ރީޖަންތަކުގެ ކޮމާންޑަރުން ގުޅުވައިދިނުމުގެ މަސައްކަތް ވަރަށް އަވަހަށް ފައްޓަވާނޭ ކަމަށް ވިދާޅުވިއެވެ.
ފުލުހުންގެ 92 ވަނަ އަހަރީ ދުވަހު ‘ގިރިންދާ، ޖަމިއްޔާގެ އިސްފަރާތްތަކާއެކު ކޮމިޝަނަރ އޮފް ޕޮލިސް ބޭއްވި ބައްދަލުވުން
ހުވަދު އަތޮޅުގައި "ގިރިންދާ" ޖަމިއްޔާއިން މިކުރާ މަސައްކަތަކީ އުނދަގޫ އެހެނަސް އެހާމެ މުހިއްމު މަސައްކަތެއް ކަމަށާއި، މިމަސައްކަތުގެ ސަބަބުން ހުވަދު އަތޮޅުގެ ގިނަ ރަށްރަށުގެ ކުށުގެވެށިން ޢާއްމު ކުށްތައް ރެކޯރޑް ޢަދަދަކަށް މަދުކުރެވިފައިވާކަން މިބައްދަލުވުމުގައި ބައިވެރިވެލެއްވި ހުރިހާ ފުލުހުންވެސް ފާހަނގަކޮށްފައިވާކަމަށް "ގިރިންދާ" ގެ ފަރާތުން މަޢުލޫމާތު ދެއްވިއެވެ.
މިކަން ފާހަނގަ ކުރައްވަމުން ތިނަދޫ ސިޓީގެ ކޮމާންޑަރ މުފްލިޙް އިބްރާހީމް ވިދާޅުވީ، "އަތޮޅުގެ ރަށްރަށުގެ ބައެއް ފުލުހުންނާއި ތިނަދޫ ސިޓީގެ ހުރިހާ ފުލުހުންނާއި މުވައްޒަފުން ރޭގަ އެއްކޮށް އުޅުނީ އަހަރީ ދުވަހުގެ ދިދަނެގުމުގެ ރަސްމިއްޔާތުގެ ތައްޔާރީ ތަކުގައި، ފިޠުރު ޢީދަށް ތައްޔާރުވުމަށް ތިނަދޫ ސިޓީގެ ހުރިހާ އެއްމެންވެސް އުޅުނީ މުޅިރޭ ވަރަށް ޙަރަކާތްތެރިކޮށް، ތިނަދޫ ސިޓީގެ ބަނދަރުވެސް އޮތީ ވަރަށް ޙަރަކާތްތެރިކޮށް، އެކަމަކު މުޅިރޭވެސް އަޅުގަނޑުމެންގެ ސްޓޭޝަނަށް އެއްވެސް ޝަކުވާއެއް، އެއްވެސް މައްސަލައެއް، އަދި އެބާވަތުގެ އެއްވެސް ފޯނުކޯލެއްވެސް އައިސްފައިނުވޭ، މިއީ މިހާރަކަށް އައިސް ތިނަދޫ ސިޓީއިން ޢާއްމު ކުށްތައް މަދުވެފައިވާ މިންވަރު އަންގައިދޭ ކުޑަކުޑަ މިސާލެއް،"
"ގިރިންދާ" ބޯޑުގެ ޗެއަރ ހުވަދޫ ނޫހަށް މަޢުލޫމާތު ދެއްވަމުން ވިދާޅުވިގޮތުގައި މިބައްދަލުވުމުގައި ބައިވެރި ވެލެއްވި ކައުންސިލްތަކުގެ ރައީސުންވަނީ "ގިރިންދާ" ގެ މިމަސައްކަތަކީ ކައުންސިލްތަކާއި ރަށްރަށުގެ ރައްޔިތުން ވަރަށްބޮޑަށް ބަލައިގަންނަމުންދާ، ރަށްރަށުގެ ސަލާމަތާއި ރައްކާތެރިކަމާއި، އުފެއްދުންތެރިކަމަށް ވަރަށްބޮޑު ފައިދާއެއް ކުރާ މަސައްކަތެއްކަމަށާއި، މިކަމުގައި "ގިރިންދާ" އިން މިކުރައްވާ ހިއްވަރަށް އައްސަރިބަހާއި ސާބަސް ދަންނަވާފައެވެ.
"ގިރިންދާ" ޖަމިއްޔާއަކީ މިހާތަނަށް މާބޮޑު މާލީ އެހީތެރިކަމެއް އެއްވެސް ފަރާތަކުން ނުހޯދައި، މިކަމާއި ގުޅުންހުރި އަދި މިމަސައްކަތުގެ ޒިއްމާ އަދާކުރަން ޖެހިފައިވާ ފަރާތްތަކުގެ އެހީތެރިކަމާއެކު މިމަސައްކަތުގައި ކުރިއަށްދާ ޖަމިއްޔާއެކެވެ. ކޮމިޝަނަރ އޮފް ޕޮލިސް އާއިއެކު "ގިރިންދާ" އިން ބޭއްވި މިބައްދަލުވުމުގެ މުހިއްމު އެއް ބޭނުމަކީވެސް ރަށްރަށު ކައުންސިލްތަކުން އެޖަމިއްޔާއާއިއެކު ރަސްމީ އެއްބަސްވުންތަކެއްގެ ތެރެއިން މަސައްކަތް ކުރަމުންދާއިރު މިހާތަނަށްވެސް މިމަސައްކަތުގެ ބޮޑުޙިއްޞާއެއް އަދާކުރައްވަމުންދާ ދިވެހި ފުލުހުންނާއެކު ރަސްމީ ސިފައެއްގައި މަސައްކަތް ކުރުމުގެ އިތުރު ވިސްނުމާއި މަޝްވަރާއަށް ފުލުހުންގެ އެއްމެއިސް ލީޑަރޝިޕަށް ފުރުޞަތު އެރުވުން ކަމަށް "ގިރިންދާ" ގެ ފަރާތުން މަޢުލޫމާތު ދެއްވައެވެ.
‘ގިރިންދާ، ޖަމިއްޔާއިން ދަނީ ފުލުހުންގެ ޑްރަގް އެންފޯސްމެންޓް ޑިޕާރޓްމެންޓުގެ އެހީތެރިކަމާއެކު މިއަހަރުތެރޭގައި ލ.އަތޮޅު ސަރަޙައްދާއި، ނ.އަތޮޅު ސަރަޙައްދުގައި މިމަސައްކަތް ފެއްޓުމަށް ތައްޔާރުވަމުންނެވެ.