ދިވެހިރާއްޖޭގައި 25 އަހަރުން ދަށުގެ މީހުންނަށް ދުންފަތުގެ އިސްތިއުމާލު ކުރުން މަނާކުރުމަށް ވިސްނަވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. މިކަން އެމަނިކުފާނު ހާމަކުރެއްވީ “ރައްޔިތުންނާ އެކު” ޕޮޑްކާސްޓުގައި ވާހަކަފުޅު ދައްކަވަމުންނެވެ.
ރައީސް ޑރ މުޢިއްޒު ވިދާޅުވި ގޮތުގައި ދިވެހި ޅަދަރިން ދުންފަތުގެ ނުރައްކާތެރި އާދައިގެ ތެރެއަށް ވަނުމުގެ ކުރިން އެކަން ހުއްޓުވުމަކީ މުހިންމު ކަމެކެވެ. މިކަމަށްޓަކައި “ޖެނެރޭޝަން ބޭން” އެއް ގެނައުމަށް ވިސްނާވަޑައިގަންނަވާ ކަމަށާއި، މިކަމާ ގުޅޭގޮތުން ކެބިނެޓް ކަރުދާހެއް ތައްޔާރުކުރުމަށް ސިއްޙީ ވަޒީރަށް އިރުޝާދު ދެއްވާފައިވާ ކަމަށް ވިދާޅުވިއެވެ.
ސަރުކާރުން ވިސްނާފައި ވަނީ 2000 ވަނަ އަހަރުން ފެށިގެން، ނުވަތަ 2004 ވަނަ އަހަރުން ފެށިގެން، ނުވަތަ 2007 ވަނަ އަހަރުން ފެށިގެން އުފަންވެފައިވާ އަދި އުފަންވާ ކުދިންނަށް ދުންފަތް މަނާކުރާ ގޮތަށް ޤާނޫނެއް ހެދުމަށެވެ. “18 އަހަރާއި 25 އަހަރާ ދޭތެރޭގައި އަދި އެއީ އެހާ ގިނަ ދުވަހެއް ނޫން. ކުދިން ނުވަތަ ޒުވާނުން އެކަމުގެ ތެރޭގައި އުޅޭތާ. އެކުދިން އެވަބާއިން ސަލާމަތް ކުރަން ފަސޭހަވާނެއޭ 30، 40 އަހަރުވެފައިވާ މީހުން އެކަމުން ސަލާމަތްކުރަން ބޭން ކުރުމަށްވުރެ،” ރައީސް ވިދާޅުވިއެވެ.
މީގެއިތުރުން، ދުންފަތުގެ އިސްތިއުމާލުކުރާ އެހެނިހެން އުމުރުފުރާތަކުގެ މީހުންވެސް އެ އާދަ ދޫކޮށްލުމަށާއި، ރާއްޖެއަށް ދުންފަތުގެ ބާވަތްތައް އެތެރެކޮށް ވިޔަފާރިކުރާ ފަރާތްތަކުން އެކަން ހުއްޓާލުމަށް ރައީސް ޑރ މުއިއްޒު އިލްތިމާސްކުރެއްވިއެވެ.
ރައްޔިތުންގެ ސިއްޙަތަކީ ސިޔާސީ ކުރަން ޖެހޭނެ ކަމެއް ނޫން ކަމަށް ވިދާޅުވަމުން، މިފަދަަ ކަންކަން ސިޔާސީ ކުރާކަންވެސް ރައީސް ޑރ މުއިއްޒު ވަނީ ފާހަގަކުރައްވާފައެވެ.