ޅ އޮޅުވެލިފުއްޓަށް ދިމާވެފައިވާ ކަރަންޓު މައްސަލަ ނިމުމަކަށް ގެނައުމަށް، ފެނަކައިން އިތުރު އާ އިންޖީނެއް އެއްރަށަށް ގެންގޮސް މަސައްކަތް ފަށައިއެވެ.
"ހުވަދޫ" މީޑިއާއަށް މައުލޫމާތު ދެއްވުން އޮޅުވެލިފުށީ ފެނަކަ ސްޓޭޝަން މެނޭޖަރ ޝާމިން ހަފީޒް ވިދާޅުވީ އެރަށުގެ ކަރަންޓަށް ދިމާވެފައިވާ މައްސަލައަކީ 4 އަހަރަށް ދިގުލައިގެން ގޮސްފައިވާ، ރައްޔިތުން ކަންބޮޑުވުން އިންތިހާއަށް ހުރި މައްސަލައެއް ކަމަށާއި ބާ އިންޖީނު މަރާމާތު ކޮށްކޮށް ތިބުމުގެ ސަބަބުން ދާއިމީ ޙައްލެއް ނުލިބޭ ކަމަށެވެ.
އޭނާ ވިދާޅުވީ މި ސަރުކާރު އައި ފަހުން އެރަށުގެ ރައްޔިތުންގެ މި ކަންބޮޑުވުމަށް ވަރަށް ޚާއްޞަ ސަމާލުކަމެއް ދީގެން މަސައްކަތް ކުރަައްވާކަން ފާހަގަ ކުރެވޭ ކަމަށާއި އޭގެ ނަތީޖާއަކީ ރަށުގެ އިންޖީނުގެއާ ހަމަޔަށް 400KW މުޅިން އާ ކަމިންސް ޖަނަރޭޓަރެއް ގެނެސްފައި ވުން ކަމަށެވެ. މީގެ އިތުރުން މިހާރު ކުރަމުންދާ މަސައްކަތް ނިމޭ އިރު ކަރަންޓުގެ އާ ވިއުގަ ގުޅާ ނިންމާލުމުން ކުރިން ލިބުނު އުނދަގޫ ތަކުން އަރައިގަނެ ފަސޭހަ ކަން ލިބިގެން ދާނެ ކަމަށް އޭނާ ފާހަގަ ކުރެއްވިއެވެ.
ޅ އޮޅުވެލިފުއްޓަށް އައު އިންޖީނެއް ގެންދިއުން
"ދޭތެރެއިން ދޭތެރެއިން ކަރަންޓް ކެނޑިފައި އޮތުމަކީ ވަރަށް އާންމު ކަމެއް. މިހާރު ގެނެވުން ޖަނަރޭޓަރު ބެހެއްޓި ގުޅާލުމުގެ މަސައްކަތް ނިމުމަކަށް އައުމާއެކު މުޅި މައްސަލަ އަށް ދާއިމީ ޙައްލު ލިބިގެންދާނެ އަދި ކަރަންޓު ކެނޑިގެން ދާ ދިޔުމުގައި ކަރަންޓުން ބޭނުން ކުރާ އެއްޗެއްސަށް އެލިބޭ ގެއްލުން ހުއްޓުމަކަށް އަންނާނެ،" މެނޭޖަރ ޝާމިން ވިދާޅުވިއެވެ.
ޅ އޮޅުވެލިފުއްޓަކީ 800 އަށް ވުރެ އާބާދީއެއް ދިރިއުޅޭ ރަށެކެވެ. ފެނަކަ ކުންފުނިން އެރަށުގެ 150 އަށްވުރެ ގިނަ ގެޔަކަށް ކަރަންޓު ޚިދުމަތް ދެއެވެ.
މި ސަރުކާރުން ދަނީ ރާއްޖޭގެ އެކި ރަށްރަށަށް ދިމާވެފައިވާ ކަރަންޓު މައްސަލަ ތަކަށް ދާއިމީ ޙައްލު ހޯދައިދިނުމަށް ގިނަ މަސައްކަތްތަކެއް ކުރަމުންނެވެ.