ގިނަ އަދަދެއްގެ ފަތުރުވެރިންނާއެކު އޮސްޓްރޭލިއާ ކްރޫޒްލައިނާ ރާއްޖެއަށް އައިސްފިއެވެ.
އެމްއެސްސީ މެގްނިފިކާ މި ކްރޫޒްލައިނާ ރާއްޖެއަށް އައިސްފައިވަނީ މިމަހުގެ ތިން ވަނަ ދުވަހުއެވެ.
އިމިގްރޭޝަނުން ބުނީ މި ކްރޫޒްލައިނާ ރާއްޖެ އައިސްފައިވަނީ އޮސްޓްރޭލިއާގެ ފްރެމެންޓަލް- ޕާތު އިން މިދިޔަ މަހުގެ 27ގައި ފުރައިގެން ދަތުރު ކުރުމަށްފަހު ކަމަށެވެ.
އެމްއެސްސީ މެގްނިފިކާ. ފޮޓޯ:ޓްރިޕްއެޑްވައިޒރ
މި ކްރޫޒްލައިނާގައި 1،866 ފަސިންޖަރުންނާއި 952 ފަޅުވެރިން ހިމެނޭކަމަށް އިމިގްރޭޝަނުން ވަނީ ބުނެފައެވެ.
އަދި މީ ޕެސިފިކް ސަރަހައްދުން އިންޑިއާ ކަނޑު ހުރަސްކޮށް، ސީޕޯޓް އެން-ރޫޓް ކްލިއަރެންސް އަށް ކުރި އެންމެ ދިގު ދަތުރުކަމަށްވެސް އިމިގްރޭޝަނުން ވަނީ ބުނެފައެވެ. 1800 ވުރެ ގިނަ ޓްއަރިސްޓުންނާއި އެކު ރާއްޖެ ވަން މެގްނިފިކާގައި އިމިގްރޭޝަން މުވައްޒަފުން ހަރަކާތްތެރިވެފައިވާއިރު، މިއީ މިއަހަރުގެ ތެރޭގައި ރާއްޖެއަށް އައި އަށްވަނަ ކްރޫޒްލައިނާއެވެ.
އެމްއެސްސީ މެގްނިފިކާ. ފޮޓޯ:ޓްރިޕްއެޑްވައިޒރ
ކްރޫޒްލައިންތަކުގެ މެދުގައި ރާއްޖޭގެ މަޤްބޫލުކަން އިތުރުވަމުންދާއިރު، ސަރުކާރުން ވަނީ ރާއްޖޭގެ ތިން ސަރަހައްދެއްގައި ކްރޫޒްލައިނަރތަކަށް ޚާއްސަ ޖެޓީތަކެއް ތަރައްޤީކުރުމުގެ މަސައްކަތް ފަށާފައެވެ. އަދި މި ދާއިރާއިން އިތުރު ގިނަ މަސައްކަތްތަކެއް ކުރިއަށް ގެންދަވާކަމަށް ސަރުކާރުން ވަނީ ހާމަކުރައްވާފައެވެ.
ކްރޫޒް ޓޫރިޒަމްގެ ކުރިއެރުމާއެކު، ރާއްޖެއަށް ޒިޔާރަތްކުރާ ފަތުރުވެރިންގެ އަދަދަށްވެސް ވަނީ ބޮޑު ކުރިއެރުމެއް ލިބިފައެވެ. މިގޮތުން މިއަހަރުގެ މިހާތަނަށް ހަލައްކަ ފަސްދޮޅަސް ހާހަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، ސަރުކާރުން މިއަހަރަށް އަމާޒުހިފާފައިވަނީ 2.3 މިލިއަން ފަތުރުވެރިން ރާއްޖެއަށް ގެނައުމަށެވެ
މި ކްރޫޒާލައިން ރާއްޖެއަށް އައުމުން މީ މިއަަރުގެ ތެެރޭގައި ރާއްޖެ ވަން އަށްވަނަ ކްރޫޒްލައިނާއެވެ. މިދިޔަ މަހު އެކަނިވެސް ރާއްޖެއަށް ތިން ކްރޫޒްލައިނާ ވަނީ އައިސްފައެވެ.