ދުންފަތް މަނާކުރާ އުމުރުފުރާ ކަނޑައެޅުމަށް ރައީސް ޑރ. މުޙައްމަދު މުޢިއްޒު ފެށްޓެވި ޖެނެރޭޝަންބޭން ޕޯލްގައި، ގިނަ މީހުން އެދިފައިވަނީ 2000 އިން ފެށިގެން އުފަންވެފައިވާ ކުދިންނަށް ދުންފަތް މަނާކުކުރުމަށް ކަމަށް ޕޯލުގެ މިހާތަނުގެ ނަތީޖާ ދައްކައިފިއެވެ. މި ޕޯލްއަށް 5،500 އަށްވުރެ ގިނަ މީހުން ޚިޔާލު ދީފައިވެއެވެ.
މި މަހުގެ 5 ވަނަ ދުވަހު އެކްސްގައި ކުރެއްވި ޕޯސްޓެއްގައި ރައީސް ޑރ. މުޢިއްޒު ވިދާޅުވެފައިވަނީ، ދުންފަތުގެ އިސްތިޢުމާލުކުރުން މަނާކުރުމުގެ ޖީލުތަކެއް ރާއްޖޭގައި ތަންފީޒުކުރާނަމަ، ދުންފަތުގެ އިސްތިޢުމާލު ކުރުމުގެ ގެއްލުންތަކުން ޒުވާނުންނާއި އަންނަން އޮތް ޖީލުތަކުގެ ޞިއްޙަތު ރައްކާތެރިކުރެވިގެން ދާނެ ކަމަށެވެ.
ރައީސް ވިދާޅުވެފައިވަނީ، ކުރިއަށް އޮތް ޖީލު ދުންފަތުން ސަލާމަތް ކުރުމަށް ޤާނޫނެއް ހެދުމަށް ނިންމަވާފައިވާ ކަމަށާއި، އެގޮތުން އާންމުންގެ ޚިޔާލު ހޯދުމަށް ހުޅުވާލާފައިވަނީ އެންމެ ރަނގަޅު އުމުރުފުރާއެއް ހޯދުމަށް ކަމަށެވެ. މިގޮތުން ހުށަހަޅުއްވާފައިވާ އުމުރުފުރާތަކަކީ:
- 2000 ވަނަ އަހަރުން ފެށިގެން (25 އަހަރުން ދަށުގެ އުމުރުފުރާ)
- 2004 ވަނަ އަހަރުން ފެށިގެން (21 އަހަރުން ދަށުގެ އުމުރުފުރާ)
- 2007 ވަނަ އަހަރުން ފެށިގެން (18 އަހަރުން ދަށުގެ އުމުރުފުރާ)
ޕޯލްގެ ނަތީޖާ ދައްކާގޮތުން:
- 51% މީހުން ވަނީ 2000 ވަނަ އަހަރުން ފެށިގެން ދުންފަތް މަނާކުރާ އުމުރުފުރާ ކަނޑައެޅުމަށް ޚިޔާލު ދީފައި
- 41% މީހުން ވަނީ 2007 ވަނަ އަހަރުން ފެށިގެން ދުންފަތް މަނާކުރާ އުމުރުފުރާ ކަނޑައެޅުމަށް ޚިޔާލު ދީފައި
- 8% މީހުން ވަނީ 2004 ވަނަ އަހަރުން ފެށިގެން ދުންފަތް މަނާކުރާ އުމުރުފުރާ ކަނޑައެޅުމަށް ޚިޔާލު ދީފައި
މި ޕޯލްގެ ނަތީޖާއަށް ބަލާއިރު، ގިނަ މީހުން އެދިފައިވަނީ 2000 ވަނަ އަހަރުން ފެށިގެން އުފަންވެފައިވާ ކުދިންނަށް ދުންފަތް މަނާކުރުމަށެވެ.