މިއަހަރުގެ އަމާޒަކީ ފަށާ ތައުލީމުގައި ހުރި މައްސަލަތައް ރަނގަޅުކޮށް ފާސްވާ ކުދިންގެ އަދަދު އިތުރުކުރުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިކަން އެމަނިކުފާނު ފާހަގަކުރެއްވީ ރައީސުލްޖުމްހޫރިއްޔާ އިސްނަންގަވައިގެން ކުރިއަށްގެންދާ “ރައްޔިތުންނާ އެކު” ޕޮޑްކާސްޓުގައި ވާހަކަފުޅު ދައްކަވަމުންނެވެ.
ރައީސް ޑރ މުޢިއްޒު ވިދާޅުވި ގޮތުގައި ތަޢުލީމީ ދާއިރާއަކީ ޤައުމު ބިނާކުރުމުގައި އެންމެ މުހިންމު އެއް ދާއިރާ ކަމަށްވާތީ، އެ ދާއިރާއަށް ސަރުކާރުން ވަރަށް ބޮޑު އިސްކަމެއް ދެއްވާ ކަމަށާއި، މިހާރު އެ ދާއިރާގައި ހުރި މައްސަލަތައް ހައްލުކުރުމަށް މަސައްކަތްތަކެއް ކުރަމުންދާ ކަމަށެވެ.
ފާއިތުވި އަހަރުތަކުގައި ގްރޭޑް 1 އިން 7 އާ ހަމައަށް ކިޔަވާ ދަރިވަރުންގެ ތެރެއިން ދިވެހި، އިނގިރޭސި އަދި ހިސާބު މާއްދާތަކުން ފާސްވާ ދަރިވަރުންގެ އަދަދު ދަށްވެފައިވާކަން ފާހަގަކުރެވިފައިވާ ކަމަށް ރައީސް ޑރ މުއިއްޒު ވިދާޅުވިއެވެ. މި މައްސަލަ ހައްލުކުރެވޭނީ ޓީޗަރުންގެ ފެންވަރު ރަނގަޅުކޮށް، ކުދިންނަށް ދެވޭ ތަޢުލީމުގެ ފެންވަރު މަތިކޮށްގެން ކަމަށް އެމަނިކުފާނު ފާހަގަކުރެއްވިއެވެ.
“ފަށާ ތައުލީމަށް ދޭންޖެހޭ އިސްކަން ކުރީގައި ނުދެވި އޮތް މައްސަލަ ހައްލު ކުރުމަށް ވަރަށް އިސްކަމެއް ދޭން މިހާރު މިވަނީ ފެށިފައި. އޭގެ ނަތީޖާ އެކަމަކު ފެންނަނީ އަދި ދުވަސްކޮޅެއް ފަހުން. އެއީ ކޮންމެ އަހަރަކުވެސް އޭގެ ޕްރޮގްރެސް ފެންނާނީ. މި ދަށްވެގެން ދިޔަ ދިޔުން ނިމުމަކަށް ގެނައުން މިއަހަރުގެ ޓާގެޓަކަށް ވާނީ،” ރައީސް ޑރ މުއިއްޒު
ތަޢުލީމީ ވުޒާރާއިން ވިދާޅުވެފައިވާ ގޮތުގައި އޯލެވެލް އަދި އޭލެވެލްގެ ނަތީޖާ ރަނގަޅުކުރެވޭނީ ޕްރައިމަރީ ތައުލީމު ނުވަތަ ފަށާ ތަޢުލީމު ރަނގަޅުކޮށްގެން ކަމަށްވާތީ، އެކަމަށް އިސްކަންދީގެން މިހާރުވަނީ ގިނަ މަސައްކަތްތަކެއް ފަށާފައެވެ.