ޤައުމީ އެއަރލައިން މޯލްޑިވިއަނުން މެލޭޝިއާ އާއި ރާއްޖެއާ ދެމެދު ޚާއްޞަ ދަތުރުތަކެއް ކުރުމަށް ނިންމައިފިއެވެ.
މި ގޮތުން މި މަހުގެ 27، 29 އަދި 30 ވަނަ ދުވަހު މެލޭޝިއާއަށް ތިން ދަތުރެއް ކުރުމަށް ވަނީ ހަމަޖެހިފައެވެ.
މި ދަތުރުތަކުގައި ބޭނުންކުރާނީ މޯލްޑިވިއަންގެ ނެރޯބޮޑީ އެއަރބަސް އޭ320 އާއި ވައިޑްބޮޑީ އެއަރބަސް އޭ330 އެވެ. އަދި މި ދަތުރުތަކަށް ޓިކެޓް ވިއްކަން މިހާރު ވަނީ ފަށާފައިކަމަށް އެއަރލައިނުން މަޢުލޫމާތު ދީފައިވެއެވެ.
މެލޭޝިއާއަކީ މިހާރުވެސް ގިނަ އަދަދެއްގެ ދިވެހިން ދިރިއުޅެމުންދާ ޤައުމެއްގެ އިތުރުން، ތަފާތު ބޭނުންތަކަށް ދިވެހިން ދަތުރުކުރާ މަންޒިލެކެވެ. ފާއިތުވި އަހަރު ރާއްޖެއަށް 19،000 އަށްވުރެ ގިނަ މެލޭޝިއާގެ ފަތުރުވެރިން ޒިޔާރަތްކޮށްފައިވާކަން ފަތުރުވެރިކަމާއި ތިމާވެއްޓާބެހޭ ވުޒާރާގެ ތަފާސްހިސާބުތަކުން ދައްކައެވެ.
މޯލްޑިވިއަނުން މި އަހަރުގެ ކުރީކޮޅު ވައިޑް-ބޮޑީ މަތިންދާ ބޯޓު ޚިދުމަތަށް ތަޢާރަފުކުރުމާއެކު، މިހާރު ވަނީ ޗައިނާގެ ޗެންޑީ، ބެއިޖިންގ އަދި ޝަންހާއީއަށް ދަތުރުތައް ފަށާފައެވެ. އަދި ކުރިއަށް އޮތް ތަނުގައި ތައިލެންޑާއި ޔޫރަޕަށްވެސް ދަތުރުތައް ފެށުމަށް އެ އެއަރލައިނުން ދަނީ ތައްޔާރުވަމުންނެވެ.
މި ދަތުރުތަކާ ގުޅޭ އިތުރު މަޢުލޫމާތު ހޯދުމަށާއި ޓިކެޓް ގަތުމަށް މޯލްޑިވިއަންގެ ވެބްސައިޓުން ނުވަތަ 24 ގަޑިއިރު ޚިދުމަތްދޭ ކޯލް ސެންޓަރުގެ ނަންބަރު 1671 އަށް ގުޅުމުން ލިބޭނެ ކަމަށް އެއަރލައިނުން މަޢުލޫމާތު ދީފައިވެއެވެ.