އެއަރޕޯޓުގެ މުވައްޒަފުންނަކީ އަގުހުރި ގައުމީ ހިދުމަތްތަކެއް ކުރަމުންދާ ބައެއް ކަން ފާހަގަކުރައްވައި، އެމް.އޭ.ސީ.އެލްގެ ސީ.އީ.އޯ އަދި މެނޭޖިންގ ޑިރެކްޓަރ އިބްރާހިމް ޝަރީފް ޚާއްސަ ޝުކުރެއް އަދާކުރައްވައިފިއެވެ. ޝަރީފު މިހެން ވިދާޅުވީ، ވެލާނާ އިންޓަނޭޝަނަލް އެއަރޕޯޓް (ވީއައިއޭ) ގެ 59 ވަނަ އަހަރީ ދުވަސް ފާހަގަކުރުމުގެ ގޮތުން ބޭއްވުނު ކުލަގަދަ ރަސްމިއްޔާތުގައެވެ.
އަހަރީ ދުވަހުގެ ރަސްމިއްޔާތު ފެށިފައިވަނީ ދިދަ ނެގުމުގެ ރަސްމިއްޔާތަކުންނެވެ. މި ރަސްމިއްޔާތުގައި ކުންފުނީގެ މެނޭޖްމަންޓާއި މުވައްޒަފުންގެ އިތުރުން އެކި ސްޓޭކްހޯލްޑަރުން ބައިވެރިވެ ވަޑައިގެންނެވިއެވެ.
ވެލާނަ އިންޓާނޭޝަނަލް އެއާޕޯޓުގެ 59 ވަނަ އަހަރީ ދުވަސް ފާހަގަކުރުން / ފޮޓޯ: ވީއައިއޭ
އެއާރޕޯޓުގެ ތަރައްގީއަށްޓަކައި ވަރަށް މުހިންމު ބޮޑެތި މަޝްރޫޢުތައް ހިނގަމުންދާކަމަށް ފާހަގަކުރައްވައި ޝަރީފް ވިދާޅުވީ، ކޮންޓްރެކްޓަރު ނިންމާނީ ފެސިލިޓީސް ކަމަށާއި އެތަންތަން އޮޕަރޭޝަނަލައިޒްކޮށް، ގައުމަށް އޭގެ ފައިދާ ހޯދައިދޭން ތިބީ އެއާޕޯޓުގެ މުވައްޒަފުންކަމަށެވެ. އެގޮތުން އެއާރޕޯޓުގެ މުވައްޒަފުންނަކީ އަބަދުވެސް ޤައުމަށްޓަކައި އަގުހުރި ހިދުމަތްތަކެއް ކުރާ ބައެއްކަން ފާހަގަކުރަައްވަމުން އެކަމަށްޓަކައި މުވައްޒަފުންނަށް އޭނާ ޝުކުރު އަދާކުރެއްވިއެވެ.
ވެލާނަ އިންޓާނޭޝަނަލް އެއާޕޯޓުގެ 59 ވަނަ އަހަރީ ދުވަސް ފާހަގަކުރުން / ފޮޓޯ: ވީއައިއޭ
"އެއަރޕޯޓުގެ މުވައްޒަފުންނަކީ އަބަދުވެސް ޤައުމަށްޓަކައި އަގުހުރި ޚިދުމަތްތަކެއް ކުރާ ބައެއް. ކޮންޓްރެކްޓަރު ނިންމާނީ ފެސިލިޓީސް، އެހެންނަމަވެސް އެތަންތަން އޮޕަރޭޝަނަލައިޒްކޮށް، ޤައުމަށް އޭގެ ފައިދާ ހޯދައިދޭން ތިބީ އެއަރޕޯޓުގެ މުވައްޒަފުން،" ސީއީއޯ ޝަރީފް ވިދާޅުވިއެވެ.
ވެލާނަ އިންޓާނޭޝަނަލް އެއާޕޯޓުގެ 59 ވަނަ އަހަރީ ދުވަސް ފާހަގަކުރުން / ފޮޓޯ: ވީއައިއޭ
ރަސްމިއްޔާތުގައި ވާހަކަފުޅު ދައްކަވަމުން ޝަރީފް ވަނީ އެއަރޕޯޓުގެ ތަރައްޤީއަށް ސަރުކާރުން، ޚާއްސަކޮށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާ އަހައްމިއްޔަތުކަން ފާހަގަކުރައްވައި، އެކަމަށް ޝުކުރު އަދާކުރައްވާފައެވެ. އަދި ކުރިއަށް އޮތް އަހަރަކީ އެއަރޕޯޓުގެ ޚިދުމަތްތައް އިތުރަށް ތަރައްޤީވެގެންދާނެ އަހަރެއްކަމަށާއި، ފަސިންޖަރުންނަށް އުފާވެރި ތަޖުރިބާތަކެއް ފޯރުކޮށްދިނުމަށް މަސައްކަތްކުރަންޖެހޭކަމުގައި ވިދާޅުވިއެވެ.
އަހަރީ ދުވަހުގެ މުނާސަބަތުގައި 59 ފޫޓުގެ ކޭކެއް ކެޑުމުގެ އިތުރުން، އެކުވެރިކަމުގެ ހިނގާލުމެއްވެސް ބޭއްވުނެވެ.
މީގެ އިތުރުންވެސް އަހަރީދުވަސް ފާހަގަކުރުމަށްޓަކައި ކުރިއަށް އޮތް ދުވަސްތަކުގައި މުވައްޒަފުންނަށް ހާއްސަ ގާލާ ނައިޓަކާއި ވަންޑޭ ހޭންޑްބޯލް މުބާރާތެއްވެސް ކުރިއަށް ގެންދިއުމަށް ވަނީ ހަމަޖައްސާފައެވެ.