ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަދި އެމަނިކުފާނުގެ ޢާއިލާގެ ފަރިއްކޮޅަށް ދުވާލަކު 9،000 ރުފިޔާ ޚަރަދުވާ ކަމަށް ބުނެ ސޯޝަލް މީޑިޔާގައި ފެތުރެމުންދާ ވާހަކައަކީ ޙަޤީޤަތާ ޚިލާފު ދޮގު ވާހަކައެއްކަމަށް ރިޔާސީ ގަނޑުވަރުގެ ވަޒީރު އިޤުބާލު އާދަމް ވިދާޅުވެއްޖެއެވެ.
ފާއިތުވި ދުވަސްތަކުގައި ސޯޝަލް މީޑިޔާގައި ދައުރުވަމުން އައި މި ވާހަކައިގައި ބުނެފައިވަނީ ރައީސްގެ ޢާއިލާގެ ފަރިއްކޮޅަށް ގިނަ ޢަދަދެއްގެ ތަކެތި ގަނެފައިވާ ކަމަށެވެ. އަދި އެގޮތުން އެންމެ ދުވަހެއްގެ ފަރިއްކޮޅަށް 9،000 ރުފިޔާގެ ތަކެތި މުލިއާގެއަށް ގަނެފައިވާ ކަމަށް ތުހުމަތުކޮށްފައިވެއެވެ.
މި މައްސަލައާ ގުޅޭގޮތުން އެކްސް (ކުރީގެ ޓްވިޓަރ) ގައި ޕޯސްޓެއް ކުރައްވަމުން މިނިސްޓަރު އިޤުބާލު ވިދާޅުވެފައި ވަނީ "ރައީސްއާއި އެމަނިކުފާނުގެ އާއިލާގެ ފަރިއްކޮޅަށް ދުވާލަކު 9،000 ރުފިޔާގެ ތަކެތި ގަތް ވާހަކައަކީ ކަނޑައެޅިގެން ދޮގެއް" ކަމަށެވެ. އަދި މިފަދަ ދޮގު މަޢުލޫމާތު ނުފެތުރުމަށް އާންމުންގެ އަރިހުން އެދިވަޑައިގެންފައިވެއެވެ.
ފާހަގަކޮށްލެވޭ ކަމަކީ، މި ވާހަކަ ސޯޝަލް މީޑިޔާގައި ފެތުރެން ފެށުމާއެކު ބައެއް މީޑިޔާތަކުންވެސް މި ޚަބަރު ގެނެސްދީފައިވާކަމެވެ. ނަމަވެސް މިއީ އެއްވެސް ޙަޤީޤަތެއް އޮތް ވާހަކައެއް ނޫންކަން މިހާރު ވަނީ ސަރުކާރުގެ ފަރާތުން ސާފުކޮށްދީފައެވެ.
ރައީސް މުޢިއްޒު އަދި އެމަނިކުފާނުގެ އާއިލާއާ ގުޅުވައިގެން ސޯޝަލް މީޑިޔާގައި ދޮގު ވާހަކަތަކެއް ފެތުރިފައިވާއިރު، ސަރުކާރުން އަންނަނީ މިފަދަ ވާހަކަތަކުގެ ޙަޤީޤަތް އާންމުންނާ ހިއްސާކުރަމުންނެވެ.