ވެލާނާ އިންޓަނޭޝަނަލް އެއަރޕޯޓް (ވީއައިއޭ) ގެ 59 އަހަރުގެ ޤައުމީ ޚިދުމަތުގެ އަގު ވަޒަންކުރައްވައި، އެމް.އޭ.ސީ.އެލްގެ އެހާރާއި މިހާރުގެ ހުރިހާ ޚިދުމަތްތެރިންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޝުކުރު އަދާކުރައްވައިފިއެވެ.
ރައީސް މުޢިއްޒު މިފަދައިން ވިދާޅުވެފައިވަނީ ވެލާނާ އިންޓަނޭޝަނަލް އެއަރޕޯޓުގެ 59 ވަނަ އަހަރީ ދުވަހާ ގުޅިގެން އެކްސް (ކުރީގެ ޓްވިޓަރ) މެދުވެރިކޮށް ފޮނުއްވި ތަހުނިޔާގެ މެސެޖުގައެވެ. މި މެސެޖުގައި އެމަނިކުފާނު ވަނީ އެމް.އޭ.ސީ.އެލްގެ އެހާރާއި މިހާރުގެ ހުރިހާ ޚިދުމަތްތެރިންގެ މަސައްކަތްތަކުގެ އަގުވަޒަންކުރައްވައި، ޝުކުރު ދަންނަވާފައެވެ.
އެމް.އޭ.ސީ.އެލްގެ 59 ވަނަ އަހަރީ ދުވަސް ފާހަގަކުރުމުގެ ގޮތުން މިއަދު ވަނީ ދިދަ ނެގުމުގެ ޚާއްސަ ރަސްމިއްޔާތެއް ބޭއްވިފައެވެ. މީގެއިތުރުން އެކުވެރިކަމުގެ ހިނގާލުމެއްވެސް ބޭއްވިފައިވެއެވެ. މި ރަސްމިއްޔާތުގައި ކުންފުނީގެ މެނޭޖްމަންޓާއި މުވައްޒަފުންގެ އިތުރުން އެކި ސްޓޭކްހޯލްޑަރުން ބައިވެރިވިއެވެ.
އަހަރީ ދުވަހުގެ މުނާސަބަތުގައި 59 ފޫޓުގެ ކޭކެއް ކެޑުމުގެ އިތުރުން، އެކުވެރިކަމުގެ ހިނގާލުމެއްވެސް ބޭއްވުނެވެ.
މީގެ އިތުރުންވެސް އަހަރީދުވަސް ފާހަގަކުރުމަށްޓަކައި ކުރިއަށް އޮތް ދުވަސްތަކުގައި މުވައްޒަފުންނަށް ހާއްސަ ގާލާ ނައިޓަކާއި ވަންޑޭ ހޭންޑްބޯލް މުބާރާތެއްވެސް ކުރިއަށް ގެންދިއުމަށް ވަނީ ހަމަޖައްސާފައެވެ.
ވެލާނާ އިންޓަނޭޝަނަލް އެއަރޕޯޓަކީ ރާއްޖޭގެ މައި ވައިގެ ބަނދަރުގެ ގޮތުގައި، ރާއްޖޭގެ ފަތުރުވެރިކަމާއި އިޤްތިޞާދަށް އަގުހުރި ޚިދުމަތްތަކެއް ފޯރުކޮށްދެމުންދާ ތަނެއްގެ ގޮތުގައި ފާހަގަކުރެވެއެވެ.