އެމްޓީސީސީގެ މެނޭޖިންގ ޑިރެކްޓަރ ރިޓަޔާޑް ޑީސީޕީ އަހުމަދު ސައުދީ އާއި އެ ކުންފުނީގެ އިސްވެރިންގެ ޓީމެއް ހުވަދު އަތޮޅުގައި ކުރިއަށްދާ މަޝްރޫޢުތައް ބައްލަވާލެއްވުމަށް ދަތުރުފުޅެއް ކުރައްވައިފިއެވެ. މި ދަތުރުފުޅުގައި އެމްޑީ ސައުދީގެ އިތުރުން އެމްޓީސީސީގެ ޗެއާމަން މުހައްމަދު އަފީފް ހުސައިން އާއި ޑެޕިއުޓީ މެނޭޖިންގ ޑިރެކްޓަރ މުހައްމަދު ޖަމްޝީދު އަދި ސީނިއާ މެނޭޖްމަންޓްގެ އެހެން ބޭފުޅުން ބައިވެރިވެ ވަޑައިގެންނެވިއެވެ.
އެމްޓީސީސީގެ އިސްވެރިންގެ ޓީމުން ގދ. ތިނަދޫގައި ކުރިއަށްދާ މަޝްރޫޢުތަކުގެ ތެރެއިން އިންޑަސްޓްރިއަލް ޒޯން އާއި ޝޯ ޕްރޮޓެކްޝަން ސްޓްރަކްޗަރގެ ބިން ހިއްކުމުގެ މަސައްކަތް ކުރިއަށްދާ މިންވަރު ބައްލަވާލެއްވިއެވެ. އަަދި މަޝްރޫޢު ސައިޓުގައި މަސައްކަތްކުރައްވާ މުވައްޒަފުންނާ ބައްދަލުކުރެއްވިއެވެ. މީގެ އިތުރުން، ތިނަދޫ ޒޯން 5 ގައި މަސައްކަތްކުރައްވާ އާރްޓީއެލްގެ މުވައްޒަފުންނާ ވެސް ބައްދަލުކުރެއްވިއެވެ.
އެމްޓީސީސީގެ އިސްވެރިންގެ ޓީމުން ގދ. މަޑަވެލި-ހޯޑެއްދޫ ކޯޒްވޭގެ މަސައްކަތް ކުރިއަށްދާ މިންވަރު ވެސް ބައްލަވާލެއްވިއެވެ. މި މަޝްރޫޢަކީ 84.17 މިލިއަން ރުފިޔާގެ އަގުގައި ކުރިއަށްދާ މަޝްރޫޢެކެވެ. މި މަޝްރޫޢުގެ ދަށުން 383 މީޓަރުގެ ދިގުމިނުގެ ކޯޒްވޭއެއް އެޅުމުގެ އިތުރުން 260 މީޓަރުގެ ސަރަހައްދެއްގެ ގޮނޑުދޮށް ހިމާޔަތްކުރުމާއި، 262 މީޓަރުގެ މަގު ހެދުމުގެ މަސައްކަތްތައް ހިމެނެއެވެ.
މީގެ ދެއަހަރު ކުރިން 2022 ވަނަ އަހަރުގެ ސެޕްޓެމްބަރު 13 ވަނަ ދުވަހު އިފްތިތާހުކުރި މި މަޝްރޫޢުގެ ދަށުން މަގު މާކުކުރުމާއި، ޕޭވްމަންޓް ހެދުމާއި، މަގުބައްތި ހަރުކުރުމުގެ މަސައްކަތްތައް ވެސް ހިމެނޭއިރު މި މަޝްރޫއުގެ މަސައްކަތް މިހާރު ވަނީ ނިމުމަކާ ކައިރިވެފައެވެ،