އައިލެންޑް އޭވިއޭޝަންގެ ޚިދުމަތް ފެށި 25 އަހަރު ފުރުމާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ކުންފުންޏަށް ހެޔޮއެދުންތައް ފޮނުއްވައިފިއެވެ.
އެކްސް މެދުވެރިކޮށް ކުރެއްވި ޕޯސްޓެއްގައި ރައީސް ޑރ މުއިއްޒު ވިދާޅުވީ މެދުކެނޑުމެއްނެތި 25 އަހަރު ދިވެހި ޤައުމުގެ ނަން ވައިގެ ތެރޭގައި ފަވަމުން، އައިލެންޑް އޭވިއޭޝަންގެ ޓީމުން ކުރައްވަވާ ހިންމަތްތެރި މަސައްކަތަށް ފަޚުރުވެރިވެވަޑައިގަންނަވާ ކަމަށެވެ.
ދިވެހިރާއްޖޭގެ ޤައުމީ އެއާލައިން ކަމުގައިވާ މޯލްޑިވިއަން ހިންގާ މި ކުންފުނިން ވަނީ އެތައް ކާމިޔާބީތަކެއް ހޯދާފައެވެ. މީގެ ތެރޭގައި މިދިޔަ ޖެނުއަރީ މަހު ރާއްޖެއަށް ގެނެވުނު ފުރަތަމަ ވައިޑް-ބޮޑީ މަތިންދާބޯޓު ހިމެނެއެވެ. މިއީ ރައީސް މުއިއްޒުގެ ރިޔާސީ ވައުދެއް ފުއްދުމުގެ ގޮތުން ކުރެވުނު މުހިންމު މަސައްކަތެކެވެ.
ސަރުކާރުން ދަނީ މި ކުންފުނީގެ ހިންގުން އިތުރަށް ހަރުދަނާކޮށް، ޚިދުމަތްތައް ފުޅާކުރުމަށް މަސައްކަތްތަކެއް ކުރަމުންނެވެ.
މިގޮތުން އެއާބަސް އޭ330 މަތިންދާބޯޓެއް ވަނީ ގެނެވިފައެވެ. އަދި އިތުރު ބޯޓެއް ގެނައުމުގެ މަސައްކަތްވެސް ކުރިއަށްދެއެވެ. މިހާރު މޯލްޑިވިއަންގެ ޚިދުމަތް ރާއްޖޭގެ އެތެރޭގެ އުދުހުންތަކުގެ އިތުރުން ބައިނަލްއަޤްވާމީ ވައިގެ ދަތުރުތަކަށްވެސް ފުޅާވެފައިވެއެވެ.