14 އަހަރުގެ ކުއްޖަކަށް ޖިންސީ ގޯނާކުރި މައްސަލައެއްގެ ތަޙުޤީޤު ކުރިއަށްދާ ކަމަށް ފުލުހުން ހާމަކޮށްފިއެވެ.
ފުލުހުން މިކަން ހާމަކޮށްފައި ވަނީ ޓިކްޓޮކްގައި އަންހެންކުއްޖަކު އޭނާއަށް ޖިންސީ ގޯނާ ކުރިމައްސަލައަށް އިންސާފު ނުލިބޭ ކަމަށް ބުނެ ދައްކާފައިވާ ވާހަކައިގެ އަޑު ގަދަ ވަމުން އަންނަ ދަނޑިވަޅެއްގައެވެ، ޓިކްޓޮކް ވީޑިއޯއެއްގައި އަންހެންކުއްޖަކު ވަރަށް ތަފުސީލުކޮށް ކަންހިނގި ގޮތާއި މައްސަލަ ހުށަހެޅި އަހަރާއި އަދި ކަންތައް ވީގޮތް ކިޔައިދީފައިވެއެވެ. މިކަމާ ގުޅިގެން ޕޮލިސްމީޑިއާގައި ކުރެވުނުސުވާލަކަށްފަހު ފުލުހުން ވަނީ ސައުތުސެންޓްރަލް ޕޮލިސް ހިމެނޭ ސަރަހައްދުގެ ރަށެއްގައި ކުޑަކުއްޖަކަށް ޖިންސީ ގޯނާ ކުރި މައްސަލައެއްގެ ވާހަކަ ހާމަކޮށްފައެވެ.
އެގޮތުން ފުލުހުން ބުނި ގޮތުގައި ސައުތު ސެންޓްރަލް ޕޮލިސް (އމ، ފ، ދ، ތ، ލ) ސަރަޙައްދުގައި ހިމެނޭ ރަށެއްގައި 14 އަހަރުގެ ކުއްޖަކަށް ފޯނުން ބަރަހަނާ ފޮޓޯ އާއި ވީޑިއޯ އަދި ޖިންސީ ގޯނާ ދެއްކި ކަމަށް ތުހުމަތުކުރެވޭ މައްސަލައެއް 2022 ޖަނަވަރީ 22 ވަނަ ދުވަހު ފުލުހުންނަށް ހުށަހަޅާފައިވާކަމަށެވެ.
މި މައްސަލައިގެ ތަޙުޤީޤުގައި، ތުހުމަތުކުރެވޭ މީހާގެ ފޯނާއި ލެޕްޓޮޕް ފޮރެންސިކް ތަޙުލީލުތައް ހަދާފައިވާ ކަމަށް ފުލުހުން މަޢުލޫމާތު ދެއެވެ. މީގެއިތުރުން 6 މީހެއްގެ ބަޔާނާއި ހެކިބަސް އަދި 2 މީހެއްގެ ބަޔާން ނަގާފައިވާކަމަށް ފުލުހުން ބުނެއެވެ.
ނަމަވެސް މިހާތަނަށް ކުރެވިފައިވާ ތަޙުލީލުތަކުންނާއި ނެގިފައިވާ ބަޔާންތަކުން، ކުއްޖާ ބުނާ ބުނުން ފިޔަވައި، މައްސަލައާ ގުޅުންހުރި އަދި ކުރާ ތުހުމަތަށް ބާރުލިބޭ އެއްވެސް ހެއްކެއް ނުވަތަ ގަރީނާއެއް ލިބިފައިނުވާކަމަށް ފުލުހުން ފާހަގަކުރެއެވެ. އަދި ތުހުމަތުކުރެވޭ މީހާ ކުއްޖާގެ ފޯނަށް ފޮނުވާފައިވާ ކަމަށް ބުނާ މެސެޖްތަކާއި މައްސަލައާ ގުޅުންހުރި އެއްވެސް އެއްޗެއް ކުއްޖާގެ ފޯނުގެ ފޮރެންސިކް ތަޙުލީލުތަކުންވެސް ފެނިފައިނުވެއެވެ.
މި މައްސަލަ ތަޙުޤީޤުކޮށް 2022 އޭޕްރިލް 22 ވަނަ ދުވަހު ޕްރޮސިކިއުޓަރ ޖެނެރަލްގެ މަޝްވަރާއަށް ފޮނުވުމުން، ބައެއް އިސްލާޙުތައް ގެނައުމަށް އެ އޮފީހުން އެދިފައިވެއެވެ. ނަމަވެސް މި އިސްލާޙުތައް ގެނައުމުގައި މައްސަލަ ހުށަހަޅާ ފަރާތުން އެއްބާރުލުން ލިބިފައިނުވާތީ މައްސަލަ މިހާތަނަށް ވަނީ ނުނިމިއެވެ.
ފުލުހުން މަޢުލޫމާތު ދޭގޮތުގައި މި މައްސަލައިގެ ތަޙުޤީޤު ފުރިހަމަ ކުރުމަށް ކުރެވެންހުރި މަސައްކަތްތައް ފުލުހުން ދަނީ ކުރަމުންނެވެ.