މަސްތުވާތަކެތިން އަރައިގަތުމަށް މަސައްކަތްކުރަމުންދާ މީހުންނަށް ހިތްވަރުދީ އެހީތެރިވުމަށް، މަސްތުވާތަކެތީގެ ވަބާއިން އަރައިގަނެފައިވާ 30 މީހުންނަށް ދިނުމަށް ފުރުޞަތު ހުޅުވާލައިފިއެވެ. މި ފުރުޞަތު ހުޅުވާލާފައިވަނީ ނޭޝަނަލް ޑްރަގް އެޖެންސީ (އެންޑީއޭ) އިންނެވެ.
އެންޑީއޭއިން ބުނެފައިވާ ގޮތުގައި، ޑްރަގް ރީހެބިލިޓޭޝަން ސެންޓަރުތަކުގައި ފަރުވާ ދެމުންދާ މީހުންނަށް މަގުދައްކައިދީ އެހީތެރިކަން ފޯރުކޮށްދިނުމަށް ހިލޭސާބަހަށް މަސައްކަތްކުރެވޭނެއެވެ. މި މަސައްކަތަށް ކުރިމަތިލާ ފަރާތްތަކުގައި ހުންނަންޖެހޭ ޝަރުތުތަކުގެ ތެރޭގައި ގްރޭޑް 7 ނިންމާފައިވުމާއި، މަސްތުވާތަކެތީގެ ފަރުވާއެއް ފުރިހަމަކޮށް މަސްތުން ސާފުވެފައިވާ މީހަކަށްވުން ހިމެނެއެވެ.
މި މަސައްކަތް ކުރުމަށް ހުޅުވާލާފައިވާ ތަންތަނުގެ ތެރޭގައި އެންޑީއޭ، ކ. ހިންމަފުށީގައި ޤާއިމުކޮށްފައިވާ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރު، ހުޅުމާލޭގައި ޤާއިމުކޮށްފައިވާ ހާފްވޭހައުސް، ދަގެނާ، އަދި ސ. ހުޅުދޫގައި ޤާއިމުކޮށްފައިވާ ވިލުނު ސެންޓަރު ހިމެނެއެވެ. މީގެއިތުރުން ގދ. ތިނަދޫ، ސ. ހިތަދޫ އަދި ޏ. ފުވައްމުލަކު ސިޓީގައި ޤާއިމުކޮށްފައިވާ ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ރިހެބިލިޓޭޝަން ސެންޓަރުތަކުގައިވެސް މި މަސައްކަތް ކުރެވޭނެއެވެ.
އެންޑީއޭއިން ފާހަގަކުރި ގޮތުގައި، ސަރުކާރުން ދަނީ މަސްތުވާތަކެތިން އަރައިގަތުމަށް ދެވޭ ފަރުވާގެ ނިޒާމު އިތުރަށް ހަރުދަނާކުރެއްވުމަށް ގިނަ މަސައްކަތްތަކެއް ކުރައްވަމުންނެވެ. “ފަރުވާ ފުރިހަމަކުރުމަށްފަހު އަނބުރާ މުޖުތަމަޢަށް ނުކުންނަ މީހުންނަކީ ދީނީ ގޮތުން އަޚުލާޤު ރަނގަޅު ބައެއްކަން ކަށަވަރުކުރެވޭނެ ގޮތަށް ފަރުވާ ބައްޓަންކޮށްފައިވާ” ކަމަށް އެ އެޖެންސީން ބުންޏެވެ.
މި ފުރުޞަތުގައި ބައިވެރިވުމަށް ޝައުޤުވެރިވާ ފަރާތްތަކުން ސީވީއާއެކު ސިޓީއެއް އެންޑީއޭގެ މެއިލްއަށް ހުށަހެޅުމަށް އެ އެޖެންސީން އަންގާފައިވެއެވެ.