މޮރޮކޯގައި ބާއްވާ ޤުރުއާން މުބާރާތެއްގައި ބައިވެރިވުމުގެ ފުރުސަތު އިސްލާމީ ކަންތައްތަކާ ބެހޭ ވުޒާރާއިން ހުޅުވާލައިފިއެވެ.
މި މުބާރާތުގައި ބައިވެރިވާން އެދޭ ފޯމު ޤުރުއާނާއި ބެހޭ މަރުކަޒުން މިހާރު ދޫކުރަމުންދާއިރު، މި މުބާރާތް އޮންނާނީ މިއަހަރުގެ އޮގަސްޓުމަހުގެ ތެރޭގައެވެ.
މި މުބާރާތުގެ ޝަރުތުތަކުގެ ތެރޭގައި ހިމެނެނީ ހިޖުރީ ގޮތުން އުމުރުން 10 އަހަރާއި 40 އަހަރާއި ދެމެދުގެ ފަރާތަކަށްވުމާއި، ދިވެހި ރައްޔިތަކަށްވުމާއި، ރާއްޖޭގެ މަޝްހޫރު ޤާރީއަކަށް ނުވުމުގެ އިތުރުން ކުރީގައި މި މުބާރާތުގައި ބައިވެރިވެފައިވާ ފަރާތަކަށް ނުވުން ވެސް ހިމެނެއެވެ.
ބައިވެރިވެވޭ ގޮފިތަކުގެ ޝަރުތުތަކަށް ބަލާއިރު، މުޅި ޤުރްއާން އެއްކޮށް ތަޖުވީދުގެ ހަމަތަކާއެކު ހިތުން ކިޔެވުމާއި، ޤުރްއާނުގެ 7 ވަނަ ފޮތާއި 8 ވަނަ ފޮތުން ކަނޑައެޅޭ އާޔަތްތަކެއްގެ ތަފްސީރުކިޔުމުގެ ބަޔާއި، ވިދިވިދިގެން ޤުރްއާނުގެ 5 ޙިޒްބު (2 ފޮތް ބައި) ތަޖުވީދުގެ ހަމަތަކާއެކު ތަރުތީލުކޮށް ނުބަލައި ކިޔެވުމުގެ ބައެވެ.
މި މުބާރާތުގައި ބައިވެރިވުމަށް މިމަހުގެ 21 ވަނަ ދުވަހުގެ މެންދުރު 12:00ގެ ކުރިން ޤުރުއާނާއި ބެހޭ މަރުކަޒަށް ހުށަހެޅުމަށް އިސްލާމީ ކަންތައްތަކާ ބެޙޭ ވުޒާރާއިން ވަނީ އެދިވަޑައިގެންފައެވެ.