ދިވެހިބަހާ ސަޤާފަތާ ތަރިކައާ ބެހޭ ވުޒާރާގެ މުޝީރު މަޑުލު މުޙައްމަދު ވަޙީދު އަވަހާރަވުމާ ގުޅިގެން، އެ މަނިކުފާނުގެ ހަނދާނުގައި ބާއްވާ ތަޢުޒިޔާގެ ދަފްތަރު މިއަދު ދިވެހިބަހުގެ އެކެޑަމީގައި ހުޅުވާލައިފިއެވެ.
ދިވެހިބަހުގެ އެކެޑަމީން މަޢުލޫމާތު ދެއްވާފައިވާ ގޮތުގައި، ތަޢުޒިޔާގެ ދަފްތަރުގައި ޝުޢޫރު ފާޅުކުރެއްވުމުގެ ފުރުސަތު މި މަހުގެ 30 ވަނަ ދުވަހުގެ ނިޔަލަށް ހުޅުވާލެވިފައިވެއެވެ. ރަސްމީ ދުވަސްތަކުގައި ހެނދުނު 9:00 އިން މެންދުރުފަހު 1:30 އަށް ދަފްތަރުގައި ސޮއިކުރެއްވުމުގެ ފުރުސަތު ލިބިވަޑައިގަންނަވާނެއެވެ.
މި މަހުގެ މިދިޔަ އާދީއްތަ ދުވަހު އަވަހާރަވި މަޑުލު މުޙައްމަދު ވަޙީދަކީ ދިވެހިބަހާއި އަދަބިއްޔާތާއި ތާރީޚާއި ސަގާފަތުގެ ރޮނގުން ގިނަގުނަ ޚިދުމަތްތަކެއް ކޮށްދެއްވާފައިވާ އެކެޑަމީގެ މުޝީރެކެވެ. އެ މަނިކުފާނު ވަނީ 46 އަހަރަށްވުރެ ދިގު މުއްދަތެއްގައި ދިވެހިބަހުގެ ލިޔުންތެރިކަމުގެ ދާއިރާއަށް މެދުނުކެނޑި ޚިދުމަތް ކުރައްވާފައެވެ.
އެ މަނިކުފާނުގެ އަގުހުރި ޚިދުމަތްތަކުގެ އަގު ވަޒަންކުރުމުގެ ގޮތުން، 2019 ވަނަ އަހަރު ދިވެހިބަހުގެ ލިޔުންތެރިކަން ކުރިއެރުވުމުގެ ރޮނގުން ޝަރަފުވެރިކަމުގެ ޤައުމީ އިނާމު ލިބިވަޑައިގެންނެވިއެވެ. އަދި 2018 ވަނަ އަހަރު ނޫސްވެރިކަމުގެ ޝަރަފުގެ އަލިމަސް ގަލަމާއި، ޢާންމު ޚިދުމަތަށް ހިތްވަރުދިނުމުގެ އިނާމު ދެ ފަހަރުމަތިން ހާސިލުކުރެއްވިއެވެ.