ނުކުޅެދުންތެރިކަން ހުންނަ ފަރާތްތަކާއި ފަޤީރު ހާލަތުގައި ދިރިއުޅޭ ފަރާތްތަކަށް އާމްދަނީ ލިބޭނެ މަގު ފަހިކޮށްދިނުމުގެ ގޮތުން އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއާއި ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާ ދެމެދު ފަހުމުނާމާއެއްގައި ސޮއިކޮށްފިއެވެ.
މި ފަހުމުނާމާގެ ދަށުން، ނުކުޅެދުންތެރިކަން ހުންނަ ފަރާތްތަކާއި "ހާލު ކިހިނެއް؟" ޕްރޮގްރާމްގެ ތެރެއިން ދެނެގަނެވޭ ފަޤީރު ހާލަތުގައި ދިރިއުޅޭ ފަރާތްތަކުގެ ތެރެއިން ވަޒީފާއަށް ޝައުޤުވެރިވާ ފަރާތްތަކަށް ވަޒީފާގެ ފުރުސަތުތައް ހޯދައިދިނުމަށް މަސައްކަތްކުރެވޭނެއެވެ.
ނުކުޅެދުންތެރިކަން ހުންނަ ފަރާތްތަކަށް ވަޒީފާ ދިނުމުގައި، އެ ފަރާތްތަކަށް މަސައްކަތްކުރުމަށް އެކަށީގެންވާ މާހައުލެއް ޤާއިމުކުރެވިފައިވާކަން ކަށަވަރުކުރެވޭނެ ކަމަށާއި އަދި "ހާލު ކިހިނެއް" ޕްރޮގްރާމްގެ ދަށުން ދެނެގަނެވޭ ފަޤީރު ފަރާތްތަކަށް ވަޒީފާ ހަމަޖެއްސުމުގައި، އެ ފަރާތްތަކުގެ ވަނަވަރާއި ވަޒީފާގެ މަސްއޫލިއްޔަތު އަދާކުރުމުގެ ޤާބިލުކަން ހުރިތޯ ބެލޭނެކަމަށް ވުޒާރާއިން ވަނީ ބުނެފައެވެ.
މި މަސައްކަތަކީ ޢާއިލާތަކުގެ ފުދުންތެރިކަން އިތުރުކޮށް، އަމިއްލައަށް ބަރޯސާވުން ކުޑަކޮށް، އަބުރުވެރިކަމާއެކު ދިރިއުޅެވޭނެ މަގު ފަހިކޮށްދިނުމަށް ކުރެވޭ މަސައްކަތެއް ކަމަށް ވުޒާރާއިން ފާހަގަކުރެއެވެ. އަދި މިއީ ވިލުންވެރި މުޖުތަމަޢެއް ބިނާކުރުމަށް އެޅޭ މުހިންމު ފިޔަވަޅެއް ކަމަށްވެސް ވުޒާރާއިން ބުނެއެވެ.
މި ފަހުމުނާމާގެ ދަށުން ކުރިއަށް އޮތް ތަނުގައި ގިނަ ފަރާތްތަކަކަށް ވަޒީފާގެ ފުރުސަތުތައް ލިބި، އެ ފަރާތްތަކުގެ އިޖުތިމާޢީ އަދި އިޤްތިޞާދީ ހާލަތު ރަނގަޅުވެގެންދާނެ ކަމަށް އުންމީދުކުރެވެއެވެ