ރައީސް ޑރ. މުޙައްމަދު މުޢިއްޒު ރައްޔިތުންނަށް ވެވަޑައިގެންނެވި ވަޢުދުތައް ފުއްދެވުމަށް ކުރައްވަމުން ގެންދަވާ މަސައްކަތްތައް ކާމިޔާބުވަމުންދާތީ، އެމަނިކުފާނަށް ރައްޔިތުންގެ ލޯބި އިތުރުވަމުންދާ ކަމަށާއި، މިކަމާ ގުޅިގެން ހަމައިން ނެއްޓުމަކުން ވާނެ މޮޅެއް ނޯންނާނެ ކަމަށް އިޤްތިޞާދީ ތަރައްޤީއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ވަޒީރު ސަޢީދު މިފަދައިން ވިދާޅުވެފައިވަނީ، ޕީއެންއެފްގެ ޖަލްސާއެއްގައި ކުރީގެ ނައިބު ރައީސް ޑރ. މުޙައްމަދު ޖަމީލު ދެއްކެވި ވާހަކަފުޅުތަކާ ގުޅިގެންނެވެ. އެ ޖަލްސާގައި ޑރ. ޖަމީލު ވަނީ ރައީސް މުޢިއްޒަށް ނިސްބަތްކޮށް ބައެއް ހަރުކަށި ވާހަކަފުޅުތަކެއް ދައްކަވާފައެވެ.
ވަޒީރު ސަޢީދު ފާހަގަކުރެއްވި ގޮތުގައި، ރައީސް މުޢިއްޒަކީ ހަރުދަނާކަމާއި، މަޑުމައިތިރިކަމާއި، ރީތި އަޚްލާޤު ލިބިވަޑައިގެންފައިވާ ބޭފުޅެއް ކަމަށާއި، އަނެކުންގެ ކަރާމާތް ހިފަހައްޓަވާ، އަދި ހީވާގިކަމާއެކު ރެޔާއި ދުވާލު ރައްޔިތުންނަށްޓަކައި މަސައްކަތް ކުރައްވާ ބޭފުޅެއް ކަމަށެވެ.
އަދި ސިޔާސީ ޕާޓީ ހިންގުމުގެ ނަމުގައި ޑރ. ޖަމީލުމެންފަދަ ބޭފުޅުން އެ ކުރައްވަނީ ޤައުމަށާއި ޢާއިލާތަކަށްވެސް ފުރައްސާރަ ކަމަށާއި، މިއީ ކިޔަވައިގެން ތިބި ޒުވާނުންނާއި ތަހުޒީބު މުސްލިމް މުޖުތަމަޢުއެއްގެ ރައްޔިތުން ބަލައިގަންނާނެ ކަމެއް ނޫން ކަމަށްވެސް ވަޒީރު ސަޢީދު ވިދާޅުވިއެވެ.
މި މައްސަލައާ ގުޅިގެން އިނގުރައިދޫ ދާއިރާގެ މެންބަރު އިބްރާހިމް ފަލާހް ވަނީ މިފަދަ ނުބައި ވާހަކަތައް ދައްކާ ފަރާތްތަކާމެދު ފިޔަވަޅު އަޅަންޖެހޭ ކަމަށް ވިދާޅުވެފައެވެ.