ރާއްޖޭގެ ގައުމީ އެއާލައިން މޯލްޑިވިއަން އަށް 25 އަހަރު ފުރުމާ ގުޅިގެން ހިންގާ ހަރަކާތްތަކުގެ ތެރެއިން ސޯޝަލް މީޑިއާ މެދުވެރިކޮށް ބޮޑު ގިވްއަވޭއެއް ފަށައިފި އެވެ. މި ގިވްއަވޭގައި ޝެންހާއި ޑިޒްނީލޭންޑުގެ ދަތުރު ހިމެނޭ ގޮތަށް ފަސް އިނާމެއް ހުށަހަޅާފައިވެ އެވެ.
މި ގިވްއަވޭގެ އެންމެ މަތީ އިނާމުގެ ގޮތުގައި ދެ މީހަކަށް ޝެންހާއި ޑިޒްނީލޭންޑުގެ ދަތުރެއް ހަމަޖައްސާފައިވާއިރު، ދެވަނަ އިނާމުގެ ގޮތުގައި ޗައިނާގެ ދެކޮޅު ޓިކެޓެއް ހިމެނެ އެވެ. ތިންވަނަ އިނާމުގެ ގޮތުގައި މި މަހުގެ 27 އާއި 30 އާ ދެމެދު މެލޭޝިއާ އަށް ކުރާ ހާއްސަ ދަތުރުގެ ދެކޮޅު ޓިކެޓެއް ހަމަޖައްސާފައިވެ އެވެ.
ހަތަރުވަނަ އިނާމުގެ ގޮތުގައި އިންޑިއާގެ ކޮޗިން ނުވަތަ ޗެންނާއީގެ ދެކޮޅު ޓިކެޓެއް ހިމަނާފައިވާއިރު، ފަސްވަނަ އިނާމުގެ ގޮތުގައި ރާއްޖޭގެ އެތެރޭގެ ބޭނުން މަންޒިލަކަށް ދިއުމަށް ބޭނުންވާ ދެކޮޅު ޓިކެޓެއް ހަމަޖައްސާފައިވެއެވެ.
އައިލެންޑު އޭވިއޭޝަނުން ހިންގާ މި ގިވްއަވޭގައި ބައިވެރިވުމުގެ ފުރުސަތު މި މަހުގެ 25 ވަނަ ދުވަހުގެ ނިޔަލަށް ހުޅުވާލާފައިވެ އެވެ. ގިވްއަވޭގައި ބައިވެރިވެވޭނީ މޯލްޑިވިއަންގެ ފޭސްބުކް، ޓުވިޓާ އަދި އިންސްޓަގްރާމް ޕޭޖު ފޮލޯކޮށް، ގިވްއަވޭ ޕޯސްޓަށް ތިން ރަށްޓެހިން ޓެގުކޮށް “Maldivian25Years#” ހޭޝްޓެގު ކޮމެންޓު ކުރުމުންނެވެ.
މޯލްޑިވިއަންގެ މި ގިވްއަވޭ ޕޯސްޓު އެ ކުންފުނީގެ ފޭސްބުކް، އެކްސް އަދި އިންސްޓަގްރާމް ޕޭޖުތަކުން ފެންނަން ހުންނާނެ ކަމަށް އެ ކުންފުނިން މައުލޫމާތު ދީފައިވެ އެވެ.