ފުވައްމުލަކުގެ ކޮންސްޓްރަކްޝަން ސައިޓެއްގައި މަސައްކަތް ކުރަމުން ދަނިކޮށް ކުއްލި ގޮތަކަށް ވެއްޓި ނިޔާވެފައިވާ ރ. އަލިފުށީ، އަބަދަށްހިޔާގޭ ޢަބްދުﷲ ރިޝްދާން (27 އަހަރު) އަކީ ގިނަބައެއްގެ ލޯތްބާއި ހަމްދަރުދީ އަދި ހެޔޮދުއާ ލިބެމުންދާ ހިތްވަރުގަދަ ޒުވާން އަންހެނެއްގެ ފިރިމީހާއެވެ.
ޓީވީ މޯލްޑިވްސްގެ “އިހްސާސް” ޕްރޮގްރާމުން ދިވެހިންގެ ސަމާލުކަމަށް އައި އެތައް ގޮންޖެހުންތަކާއި ދިރިއުޅުމުގެ ދަތި އުނދަގޫ އެތައް ވޭނަކާއެކީ ސިއްހީ ހާލަތެއް ތަހައްމަލު ކުރަމުންދާ، އައިޒަންމެންގާ ސިންޑްރޯމްއަށް ޑައިގްނޯޒްވެ، ފަރުވާ ހޯދަމުންދާ އާމިނަތު އިރަމް އަހުމަދުގެ ފިރިމީހާއެވެ. އިރަމްގެ ވާހަކަ ޓީވީ މޯލްޑިވްސްގެ “އިހްސާސް” ޕްރޮގްރާމުން އާންމުންނަށް އެނގުނު ހިސާބުން ފެށިިގެން އިރަމް އަކީ އެތައް ބައެއްގެ ލޯބި ލިބެމުންދާ ޒުވާނެކެވެ. އިރަމްއަށް މި ބަލި ޑައިގްނޯސްކުރެވުނީ 2011 ވަނަ އަހަރުއެވެ.
މަސައްކަތު ސައިޓަށް ދިޔުމާ ހަމައަށްވެސް ރިޝްދާންގެ އެއްވެސް ސިއްހީ މައްސަލައެއް ހުރިކަން ފާހަގަނުވާ ކަމަށް މަޢުލޫމާތު ލިބެއެވެ. ނަމަވެސް މަސައްކަތުގައި އުޅެނިކޮށް ކުއްލިއަކަށް ވެއްޓުނު އޭނާ، ވަގުތުން ފުވައްމުލަކު ހޮސްޕިޓަލަށް ގެންދިޔައިރު ވަނީ ނިޔާވެފައެވެ.
“އިރަމްގެ ހަޔާތަށް ރިޝްދާން އައުން ވެގެން ދިޔައީ ދިރިއުޅުމަށް ލިބުނު ބޮޑު ހަމަޖެހުމަކަށް. އުފަލަކަށް،” މިހެން ބުނާ އަޑުތައް އިވެމުންދާއިރު، ދެމަފިރިން އެމީހުންގެ ދިރިއުޅުމުގެ ތަފާތު ވާހަކަތައް ސޯޝަލް މީޑިއާގައި ހިއްސާކުރަމުން ގެންދިޔައެވެ.
ރިޝްދާންގެ ކުއްލި މަރުވުމާ ގުޅިގެން ގިނަ ބަޔަކު ދަނީ އިރަމްއަށް ތަޢުޒިޔާ ކިޔަމުންނެވެ. އަދި މި ދަނޑިވަޅުގައި ކެތްތެރިކަން ދެއްވުން އެދި ދުޢާކުރަމުންނެވެ.
ލޯބިވާ މީހަކު، އޯގާތެރި ބައިވެރިއަކު، އެކުގައި ކޮންމެ ވަގުތެއްމެ ހިއްސާކުރާ، އުފަލާއި ހިތާމައާއި ތަކުލީފާއި ދައްޗާއި ތުރާލާއި މިހެންގޮސް ދިމާވާ ހުރިހާ ކަމެއްމެ އެކުއެކީގައި އެއްހަމައެއްގައި ހުރެ ހިއްސާކުރަމުން ބައެއްފަހަރު ތިމާއަށްވުރެ ކުރިއަށް ނުކުމެ ތިމާއަށް އަންނަ ތަކުލީފާއި ވޭނުގެ ބޮޑުބައި ލިބިގެން އެވޭން ތިމާއަށް ކުޑަކޮށް ދިނުމަށް މަސައްކަތްކުރާ ބައިވެރިއަކު ލިބިފައި އެކުގައި އުޅެފައި ވަކިވެގެން އަބަދުގެ އަބަދަށް ދިއުމުގެ ވޭން، އެހިތާމަ، އެހިތްދަތިކަން، އެކަން ތަހައްމަލުކުރަމުންދާ މީހަކަށް ނޫނީ ހަގީގަތުގައި އިހުސާސް އޭގެ ފުންމިނުން ނުކުރެވޭނެއެވެ. އިރަމްއަށް މިވަގުތު ކެތްތެރިކަން ދެއްވައި ހިތްވަރު ދެއްވާށި، އާމީން!