ދުބާއީގައި މި މަހު 28 ވަނަ ދުވަހު ފެށޭ އަރަބިއަން ޓްރެވަލް މާކެޓް (އޭޓީއެމް) އާ ދިމާކޮށް، ދުބާއީގެ 100 ޓެކްސީއެއްގައި ދިވެހިރާއްޖޭގެ ފަތުރުވެރިކަން އިސްތިހާރުކުރުމަށް ނިންމައިފިއެވެ. މި މަޝްރޫޢު ކުރިއަށް ގެންދިއުމަށް ހަމަޖެހިފައިވަނީ އެއް މަސް ދުވަހުގެ މުއްދަތަށެވެ.
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ މެނޭޖިންގ ޑިރެކްޓަރ އިބްރާހިމް ޝިޢުރީ ވިދާޅުވި ގޮތުގައި، މި އިސްތިހާރުތަކުގައި ރާއްޖޭގެ ހިތްގައިމު މަންޒަރުތަކާއެކު، އިނގިރޭސިވިލާތުގެ ލިވަޕޫލް ފުޓުބޯޅަ ކުލަބުގެ ކުޅުންތެރިންގެ ފޮޓޯތައް ވެސް ހިމެނޭނެއެވެ.
“4600 އަށްވުރެ ގިނަ އެގްޒިބިޓަރުން ޖަމާވާ ސަރަހައްދެއްގައި ރާއްޖޭގެ ބްރޭންޑިންގ އެކި އެކި 100 ޓެކްސީގައި ފެނިގެންދިޔުމަކީ ރާއްޖެ ވަރަށް ބޮޑަށް އިސްތިހާރު ވެގެންދާނެކަމެއް،” ޝިޢުރީ ވިދާޅުވިއެވެ.
ދުނިޔޭގެ 160 އަށްވުރެ ގިނަ ގައުމަކުން ބައިވެރިވާ އޭޓީއެމް ފެއަރ އަކީ މެދުއިރުމަތީގެ ސަރަހައްދުގެ އެންމެ ބޮޑު އެއް ޓްރެވަލް މާކެޓެވެ. މީގެ ކުރިން، މި އަހަރުގެ މާޗު މަހު ޖަރުމަނުވިލާތުގެ ބާލިންގައި ބޭއްވުނު އައިޓީބީ ފެއަރގެ ދުވަސްވަރު ވެސް 200 ޓެކްސީއެއްގައި ރާއްޖޭގެ ފަތުރުވެރިކަން އިސްތިހާރުކޮށްފައިވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ފަތުރުވެރިކަން ކުރިއެރުވުމަށް ކުރަމުންދާ މަސައްކަތްތަކުގެ ނަތީޖާއެއްގެ ގޮތުން، ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވަމުންދާކަން ފާހަގަކުރެވެއެވެ.