މިއަހަރުގެ އޯލެވެލް އިމްތިހާނު މިއަދު ވަނީ ރާއްޖޭގެ 260 އިމްތިހާނު މަރުކަޒެއްގައި ފެށިފައެވެ. މިއަދު ފެށުނު އެސްއެސްސީ އިމްތިހާނުގައި އިސްލާމް އަދި ދިވެހި މާއްދާގެ ޕޭޕަރުތައް ކުރިއަށް ގެންދެވުނެވެ.
ތަޢުލީމީ ވުޒާރާއިން ހާމަކުރި މަޢުލޫމާތުގައިވާ ގޮތުން، މިއަހަރުގެ އައިޖީސީއީ އޯލެވެލް އަދި އެސްއެސްސީ އިމްތިހާނުގައި ޖުމްލަ 7،971 ދަރިވަރުން ބައިވެރިވެއެވެ. އޭގެ ތެރޭގައި އެސްއެސްސީ އިމްތިހާނުގައި 7،519 ދަރިވަރުންނާއި، ކެމްބްރިޖް އޯލެވެލް އިމްތިހާނުގައި 7،666 ދަރިވަރުން ހިމެނެއެވެ. މި އިމްތިހާނުތައް ކުރިއަށްދާނީ ޖޫން މަހުގެ 11 ވަނަ ދުވަހާ ހަމައަށެވެ.
މިއަހަރުގެ އިމްތިހާނުތަކުގެ ޕްރެކްޓިކަލް ބައި މިމަހުގެ 2 ވަނަ ދުވަހުން ފެށިގެން ވަނީ ކުރިއަށް ގެންގޮސްފައެވެ. އަދި 2023 ވަނަ އަހަރުގެ ޑިސެމްބަރު މަހު ގެނެވުނު އުސޫލީ ބަދަލާ އެއްގޮތަށް، މަޖުބޫރު ހަތަރު މާއްދާ ކަމުގައިވާ އިސްލާމް، ދިވެހި، އިނގިރޭސި އަދި ހިސާބު މާއްދާގެ އިމްތިހާނު ފީ ދައްކަނީ ސަރުކާރުންނެވެ.
އައު އުސޫލުގެ ދަށުން، މޮކް އިމްތިހާނުން ފާސްނުވި ނަމަވެސް، ކޮންމެ ދަރިވަރަކަށްވެސް މަޖުބޫރު މާއްދާތަކުގެ އިމްތިހާނުގައި ބައިވެރިވެވޭނެއެވެ. މިއީ ކުރިން އޮތް އުސޫލާ ޚިލާފަށް ގެނެވުނު ބަދަލެކެވެ. މި ބަދަލު ގެނެވިފައިވަނީ ވީހާވެސް ގިނަ ދަރިވަރުންނަށް އިމްތިހާނުގައި ބައިވެރިވުމުގެ ފުރުސަތު ފަހިކޮށްދިނުމުގެ ގޮތުންނެވެ.
ތަޢުލީމީ ވުޒާރާއިން އިތުރަށް ފާހަގަކުރެއްވި ގޮތުގައި، ހުރިހާ ދަރިވަރުންވެސް މަޖުބޫރު ހަތަރު މާއްދާ ހިމެނޭހެން މަދުވެގެން ފަސް މާއްދާގައި ބައިވެރިވާންޖެހެއެވެ. އަދި ބީޓެކް ދަރިވަރުން އިތުރު އެއް މާއްދާ ކިޔަވަން ޖެހޭނެއެވެ.