އިރާދަކުރެއްވިއްޔާ އިމްތިޙާނުގައި ބައިވެރިވާ ކޮންމެ ދަރިވަރަކީވެސް ކާމިޔާބު ހޯދާ، ޤައުމު ފަޚުރުވެރިވާނެ ޚިދުމަތްތެރި ދަރިއަކަށްވާނެ ކަމަށް އުއްމީދުކުރައްވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވެއްޖެއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހެން ވިދާޅުވީ، މިއަދު ފެށުނު އެސްއެސްސީ އޯލެވެލް އިމްތިޙާނުގައި ބައިވެރިވާ 8،364 ދަރިވަރުންނަށް ކާމިޔާބަށް އެދިވަޑައިގަންނަވައި، ކުރެއްވި އެކްސްޕޯސްޓެއްގައެވެ.
އެޕޯސްޓުގައި ރައީސް ވިދާޅުވެފައިވަނީ، އިމްތިޙާނަށް ތައްޔާރުވުމަށް ދަރިވަރުން ކުރި މަސައްކަތުގައި ބަރަކާތްލެއްވުން އެދި ދުޢާކުރައްވާ ކަމަށެވެ. އަދި “އިމްތިޙާނުގެ ދުވަސްވަރަކީ ހިތްހަމަޖެހޭ ފާގަތި ދުވަސްތަކެއް” ކަމުގައި ވުމަށް އެދިވަޑައިގަންނަވާ ކަމަށާއި، ތޫނުފިލިކަމާއެކު ފަސޭހައިން ސުވާލުތަކަށް ޖަވާބުދެވުމަކީ އެމަނިކުފާނުގެ އެދުންކަމުގައި ފާހަގަކުރައްވާފައިވެއެވެ.
މީގެއިތުރުން ރައީސް ވަނީ، ބެލެނިވެރިންނާއި ސްކޫލުތަކުން އުންމީދުކުރާ ފަދަ ރަނގަޅު ނަތީޖާއެއް ދަރިވަރުންނަށް ހާސިލުވުމަށް އެދިވަޑައިގަންނަވާ ކަމަށްވެސް ވިދާޅުވެފައެވެ. އަދި ކޮންމެ ދަރިވަރަކީވެސް ދިވެހިރާއްޖެ ފަޚުރުވެރިވާނެ ފަދަ ޚިދުމަތްތެރި ދަރިއަކަށް ވާނެކަމުގެ އުންމީދު ފާޅުކުރައްވާފައިވެއެވެ.
އޯލެވެލް ނަތީޖާ ރަނގަޅުކުރުމަށް ސަރުކާރުން މަސައްކަތްތަކެއް ކުރަމުން؛ ފާއިތުވި އަހަރުތަކުގައި އޯލެވެލް އިމްތިޙާނުގައި ބައިވެރިވާ ދަރިވަރުން ފާސްވާ ނިސްބަތް ދަށްވަމުން އައުމާ ގުޅިގެން، އެކަން ހައްލުކުރުމަށް ސަރުކާރުން ވަނީ މުހިންމު ފިޔަވަޅުތަކެއް އަޅަން ފަށާފައެވެ. މިގޮތުން އެންމެ އިސްކަމެއް ދެއްވާފައިވަނީ އިބްތިދާއީ ތަޢުލީމުގެ މަރުހަލާގެ ނަތީޖާ ރަނގަޅުކޮށް، އެ މަރުހަލާގައި ދަރިވަރުންނަށް ފޯރުކޮށްދޭ ތަޢުލީމުގެ ފެންވަރު މަތިކުރުމަށެވެ.
އަދި ސްކޫލުތަކުގެ ހިންގުމުގެ ނިޒާމަށް ގެންނަ ބަދަލުތަކުގެ ތެރެއިން ދަރިވަރުންގެ ކިޔެވުމަށް އިތުރު އިސްކަމެއް ދިނުމާއެކު، ދަރިވަރުންގެ ނަތީޖާ ރަނގަޅުކުރުމަށްޓަކައި މުދައްރިސުންގެ ފެންވަރު މަތިކުރުމުގެ މަސައްކަތްތަކެއްވެސް ކުރިއަށްދާކަން ފާހަގަކުރެވެއެވެ.