ކުށުގެ މާޙައުލަށް ހުށަހެޅޭ ކުދިން ރީހެބިލިޓޭޓްކުރުމަށް އުތުރު ތިލަފަޅުގައި ތަރައްޤީކުރުމަށް ހަމަޖެހިފައިވާ “ހޯޕް އައިލެންޑް” ތަރައްޤީކޮށްދޭނެ ފަރާތެއް ހޯދުމަށް ދާޚިލީ ސަލާމަތާއި ފަންނިއްޔާތާބެހޭ ވުޒާރާއިން އިޢުލާންކޮށްފިއެވެ.
މި މަޝްރޫޢު ކުރިއަށް ގެންދިއުމަށް ޝައުޤުވެރިވާ ފަރާތްތަކަށް އެކްސްޕްރެޝަން އޮފް އިންޓަރެސްޓް ހުށަހެޅުމުގެ ފުރުސަތު މި މަހުގެ 27 ވަނަ ދުވަހާ ހަމައަށް ހުޅުވާލާފައިވެއެވެ. މި މަޝްރޫޢުގެ ދަށުން ބިން ހިއްކުމާއި، ހިއްކި ސަރަހައްދު ހިމާޔަތްކުރުމާއި، ބޭނުންވާ ވަސީލަތްތައް ތަރައްޤީކުރުން ހިމެނެއެވެ.
700 މީހުންގެ ޖާގައަށް ތަރައްޤީކުރެވޭ މި ރަށުގައި، ކުދިންނާއި މުވައްޒަފުންގެ ދިރިއުޅުމަށް ޚާއްސަ ޔުނިޓްތަކާއި، ތަޢުލީމީ އަދި ތަމްރީން ސަރަހައްދުތަކާއި، ކުޅިވަރު ކުޅޭނެ ތަންތަނާއި، ސިއްހީ ޚިދުމަތްދޭނެ މަރުކަޒެއް ޤާއިމްކުރެވޭނެއެވެ. މީގެއިތުރުން 700 މީހުންނަށް ނަމާދުކުރެވޭނެ މިސްކިތަކާއި، ހަފްލާތައް ބޭއްވޭނެ ސަރަހައްދަކާއި، ބެލެނިވެރިންނާ ބައްދަލުކުރެވޭނެ ޚާއްސަ ސަރަހައްދެއްވެސް ތަރައްޤީކުރެވޭނެއެވެ.
މި މަޝްރޫޢަށް އުތުރު ތިލަފަޅުން 15 ހެކްޓަރުގެ ބިން ހިއްކުމަށް ހަމަޖެހިފައިވާއިރު، އެތަނުގައި ތިބޭ ކުދިންނަށް އަސާސީ ތަޢުލީމާއި ދީނީ ތަރުބިއްޔަތުގެ އިތުރުން ސައިކޯ ސޯޝަލް އިންޓަވެންޝަން ޕްރޮގްރާމްތަކާއި ކޮންޓެކްޓް ސްޕޯޓްސް ޕްރޮގްރާމްތައް ހިންގުމަށް ވަނީ ރޭވިފައެވެ.
ދާޚިލީ ސަލާމަތާބެހޭ ވަޒީރު އިހްސާން ވިދާޅުވެފައިވާ ގޮތުގައި، މި މަރުކަޒުގައި ތިބޭ ކުދިން 18 އަހަރު ވަންދެން އެތަނުގައި ތިބުމަށްފަހު، ދިވެހި ފުލުހުންގެ ނުވަތަ ދިވެހި ސިފައިންގެ ޚިދުމަތުގައި ވަކި މުއްދަތަކަށް މަސައްކަތްކުރަން ޖެހޭނެއެވެ. އޭގެފަހުން އެ ކުދިން ބޭނުންވާ ދާއިރާއަކުން ކުރިއަށް ދިއުމުގެ ފުރުސަތު ދެވޭނެއެވެ.