އަބްދުއްސަމަދު މެމޯރިއަލް ހޮސްޕިޓަލު ޓާޝަރީ ފެންވަރަށް ބަދަލުކުރުމަށް، އަޅާ އިމާރާތުގެ މަސައްކަތް މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީއާ ހަވާލުކޮށްފިއެވެ.
އެމްޓީސީސީއާ އަބްދުއްސަމަދު މެމޯރިއަލް ހޮސްޕިޓަލް ޓާޝަރީ ފެންވަރަށް ތަރައްގީ ކުރަން ހަވާލުކޮށްފައިވަނީ ހެލްތު މިނިސްޓްރީން މިއަދު ހެނދުނު ބޭއްވި ރަސްމިއްޔާތެއްގައެވެ.
މި އެއްބަސްވުމުގައި ސިއްޙީ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ އަހުމަދު ގާސިމެވެ. އަދި އެމްޓީސީސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ، ޑެޕިއުޓީ ކޮމިޝަނަރ އޮފް ޕޮލިސް ރިޓަޔަރޑް އަޙްމަދު ސަޢުދީއެވެ.
އެ ކުންފުންޏާ އަބްދުއްސަމަދު މެމޯރިއަލް ހޮސްޕިޓަލު ހަވާލުކޮށްފައި ވަނީ 17 މަސް ދުވަހުގެ ތެރޭގައި މަސައްކަތް ނިންމައި ހަވާލުކުރުމަށެވެ. އެ މަޝްރޫއަކީ 147.4 މިލިއަން ރުފިޔާގެ މަޝްރޫއެކެވެ.
މި ހޮސްޕިޓަލުގެ މަސައްކަތް ކުރުމަށް ހަމަޖެހިފައިވަނީ ޑިޒައިން އެންޑް ބިލްޑް އުސޫލުންނެވެ.
މި މަޝްރޫޢުގެ ބައެއް ތަފްޞީލު:
• ތިނަދޫ ޑރ. ޢަބްދުއްޞަމަދު މެމޯރިއަލް ހޮސްޕިޓަލުގެ އައު އިމާރާތުގެ މަސައްކަތް
ޕްރޮޖެކްޓުގެ އަގު: 147،437،634.24 ރ.
މުއްދަތު: 540 ދުވަސް
ކޮންޓްރެކްޓަރ: މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ
އަބުދުއްސަމަދު މެމޯރިއަލް ހޮސްޕިޓަލުގެ އިތުރުން ދެ ރަށެއްގެ ހޮސްޕިޓަލްތައް އަޕްގްރޭޑްކުރުމުގެ މަސައްކަތް ސަރުކާރުގެ ދެ ކުންފުންޏަކާ ވަނީ ޙަވާލުކޮށްފައެވެ. އެއީ ޅ. ނައިފަރު ހޮސްޕިޓަލާއި، ރ. އުނގޫފާރު ރީޖަނަލް ހޮސްޕިޓަލެވެ. ޅ. ނައިފަރު ހޮސްޕިޓަލުގެ އަޕްގްރޭޑްކުރުމުގެ މަސައްކަތް ހަވާލުކޮށްފައިވަނީ އާރްޑީސީއާއެވެ. އަދި ރ. އުނގޫފާރު ރީޖަނަލް ހޮސްޕިޓަލުގެ އަޕްގްރޭޑްކުރުމުގެ މަސައްކަތް ހަވާލުކޮށްފައިވަނީ އެމްޓީސީސީއާއެވެ.
ސިއްޙީ ވަޒީރު ޢަބްދުﷲ ނާޡިމް އިބްރާހީމް ވިދާޅުވީ ހޮސްޕިޓަލް ޓަރޝިއަރީ ހޮސްޕިޓަލަކަށް ބަދަލުކޮށް އައު ޢިމާރާތްތައް ބޭނުންކުރަން ފެށުމާއެކު، އެ ތަންތަނަށް ދިމާވެފައިވާ ޖާގައިގެ ދަތިކަން ހައްލުވެ، ފޯރުކޮށްދޭންޖެހޭ އެންމެހާ ޚިދުމަތްތައް ރައްޔިތުންނަށް ފޯރުކޮށްދެވޭނެކަމަށެވެ. އަދި ރަށުންނާއި ރަށާއި ކައިރި އާބާދީތަކުގެ ރައްޔިތުންނަށްވެސް ޚިދުމަތް ހޯދުމުގައި ލުއިފަސޭހަތައް ލިބޭނެކަން ވަޒީރު ފާހަގަކުރެއްވިއެވެ.
ނިމިދިޔަ ސަރުކާރުން ތިނަދޫގައި އާ ޓާޝަރީ ހޮސްޕިޓަލެއް އެޅުމައްޓަކާއި، ވަނީ ކުރެހުންތައް ކުރަހާފައެވެ. އަދި ބިމިގެ އިން ވެސް ވަނީ ވަކި ކޮށްފައެވެ. ނަމަވެސް އެކަމުގެ އަމަލީ އެއްވެސް މަސައްކަތެއް ހިނގާފައެއް ނުވެއެވެ.
ތިނަދޫ ހޮސްޕިޓަލަކީ ޖާގަ އޮތް އަދި މިހާރުވެސް ޙިދުމަތްދެމުންދާ ހޮސްޕިޓަލަކަށްވާއިރު، އެ ހޮސްޕިޓަލްގެ އައު އިމާރާތްތައް އަޅައި، ތަރައްގީ ކުރުމަކީ މިސަރުކާރުގެ އިސްކަންދޭ ކަމަކަށްވާއިރު، އެކަމުގެ އަމަލީ މަސައްކަތް ފެށުމުގެ ގޮތުން އައު އިމާރާތް އެޅުމުގައި މިވަނީ ސޮއިކޮށްފައެވެ. އެ އިމާރާތް ނިމޭއިރު، ހޮސްޕިޓަލް ހުންނާނީ ޓާޝަރީ ފެންވަރުގެ ޙިދުމަތް ދެވެން ފަށާނެއެވެ.
ތިަނަދޫ ހޮސްޕިޓަލަކީ މުޅި ހުވަދޫ އަތޮޅަށް ޚިދުމަތްދެމުންދާ ސަރަހައްދީ ހޮސްޕިޓަލަކަށްވުމުން، ހޮސްޕިޓަލުގެ ޚިދުމަތްތައް ތަރަށްގީ ކުރުމުގެ މަސައްކަތް އެކި ސަރުކާރުތަކުން ކުރެއެވެ. ނަމަވެސް އެކަށީގެންވާ ފެންވަރުގައި އެއްވެސް ސަރުކާރަކުން ކުރެވިފަނެތްކަން ފާހަގަކޮށްލެވެއެވެ.
ނަމަވެސް މި ސަރުކާރުން އެ ހޮސްޕިޓަލް ޓާޝަރީ ފެންވަރުގެ ހޮސްޕިޓަލަކަށް ބަދަލުކޮށް، މިހާރު ޚިދުމަތްތައްދޭން ފެށުމުން ވަރަށް ބޮޑެތި ކުރިއެރުންތަކެއް ވަނީ ލިބިގެން ގޮސްފައެވެ.