މަސްޖިދުއްނަބަވީގެ އިމާމު ފަޟީލަތުއްޝައިޚް ޑރ. ޞަލާޙުލް ބުދައިރު، ސަލްމާން ރަސްގެފާނު މިސްކިތުގައި އިމާމުވެ މަޣުރިބު ނަމާދާއި ޢިޝާ ނަމާދު ކުރައްވައިފިއެވެ.
މިއީ އެމަނިކުފާނުގެ މި ދަތުރުފުޅުގައި އިމާމުވެ ނަމާދު ކުރެއްވި ފުރަތަމަ ފަހަރެވެ. މި ޖަމާޢަތުގެ ނަމާދުގައި ގިނަ އަދަދެއްގެ އާއްމުން ބައިވެރިވެލައްވާފައިވާކަން ފާހަގަކޮށްލެވެއެވެ.
ޑރ. ޞަލާޙުލް ބުދައިރުގެ މި ދަތުރުފުޅުގައި މާދަމާ ރޭ އިސްލާމީ މަރުކަޒުގައި އިމާމުވެ ޢިޝާ ނަމާދު ކުރައްވާ ގޮތަށް ވަނީ ހަމަޖެހިފައެވެ. އަދި ޢިޝާ ނަމާދަށްފަހު އިސްލާމީ މަރުކަޒުގައި ޚާއްސަ ދަރުހެއް އޮންނާނެއެވެ.
ޑރ. ޞަލާޙުލް ބުދައިރުގެ މި ދަތުރުފުޅަކީ ދިވެހިރާއްޖޭގެ އިސްލާމީ ޝަޚުސިއްޔަތު ވަރުގަދަ ކުރެއްވުމަށް، އިސްލާމީ އުއްމަތުގެ ފާހަގަކޮށްލެވޭ އިމާމުން ރާއްޖެއަށް ގެންނެވުމަށް ރައީސް ޑރ. މުޙައްމަދު މުޢިއްޒުގެ ލަފާފުޅާއި އިރުޝާދުގެ ދަށުން އިސްލާމީކަންތައްތަކާ ބެހޭ ވުޒާރާއިން ދެއްވި ދަޢުވަތެއްގައި ކުރައްވާ ދަތުރުފުޅެކެވެ.
ފަޟީލަތުއްޝައިޚް ޑރ. ޞަލާޙުލް ބުދައިރު، ރާއްޖެއަށް ކުރައްވަމުން ގެންދަވާ ދަތުރުފުޅުގައި ވަނީ އިމާމުންނާއި ޚަޠީބުންނާއި، މީގެ އިތުރުން ކީރިތި ޤުރުއާން ހިތުދަސްކުރުމުގެ ޕްރޮގުރާމުގެ ބައިވެރިންނާއި، ދީނީ ޢިލްމުވެރިންނާ ވެސް ވަނީ ބައްދަލު ކުރައްވާފައެވެ.