މިދިޔަ ހުކުރު ދުވަހު ފުރާޅެއް މަތިން ވެއްޓިފައި އޮތް 21 އަހަރުގެ ހައްވާ ޔުމްނު ރަޝީދުގެ މައްސަލައިގައި ފުލުހުން އަމަލުކުރިގޮތާމެދު އާންމުންގެ ފާޑުކިޔުންތައް އިތުރުވަމުން ދިޔުމާއެކު، މި މައްސަލައިގައި ހިމެނޭ އެންމެހާ ފަރާތްތަކުގެ މަޢުލޫމާތާއި ހާދިސާގެ ސީސީޓީވީ ފުޓޭޖް ފުލުހުން މިއަދު އާންމުކޮށްފިއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމެއްގައި ޕޮލިސް ކޮމިޝަނަރު ޢަލީ ޝުޖާޢު ވިދާޅުވެފައިވަނީ، މި މައްސަލައިގައި ފުލުހުން ވަކި ފަރާތަކަށް ޖެހިގެން މަސައްކަތް ކުރަމުން ނުދާކަމަށެވެ. ކޮމިޝަނަރު އިތުރަށް ހާމަކުރެއްވި ގޮތުގައި، ޙާދިސާ ހިނގި އިމާރާތުގެ ސީސީޓީވީ ފުޓޭޖްތައް ބަލައި، ޒިލާލްގެ ފޯނާއި އެހެނިހެން ތަކެތި ހޯދާފައިވަނީ ކޯޓު އަމުރެއްގެ ދަށުންކަމަށެވެ.
ފުލުހުން ވަނީ ޔުމްނު ވެއްޓުނީ އަމިއްލައަށް ކަމަށް ބުނެފައެވެ.
މި މައްސަލައިގައި ފުލުހުން އާންމު އުސޫލުން ބޭރުން އަމަލުކުރާ ކަމަށް ބުނެ ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ. ފުލުހުން ފުރަތަމަ ވެސް ޕާސްޕޯޓު ހިފެހެއްޓީ ޔުމްނު ވެއްޓުނުއިރު ގާތުގައި ހުރި ރައުދު އަހުމަދު ޒިލާލްގެ އެކަންޏެވެ.
ފުލުހުން ހާމަކުރި ގޮތުގައި ރައުދުއާއި ޔުމްނުގެ އިތުރުން މި ހާދިސާ ހިނގި ރޭގެ "ޕާޓީ"އަށް ދިޔަ މީހުންނަކީ:
- އައިޝަތު ލަޔާލީ އިގުބާލް
- އިޒްދިޔާން މުހައްމަދު މައުމޫން
- ޔޫސުފް އަހުމަދު އަކްރަމް
- ޔޫސުފް ޔައްސާރު އަބްދުލްޣަފޫރު
- އާމިނަތު ޖުނައިރާ ޖަމްޝީދު
- ހުސައިން ހަމީސް އަލީ
- އިޖާޒް ޖާއިޒް
މިއަދު ފުލުހުން ބޭއްވި ނޫސްވެރިންގެ ބައްދަލުވުމުގައި ޕޮލިސް ކޮމިޝަނަރު އަލީ ޝުޖާއު ވިދާޅުވީ، މި މައްސަލައިގައި ހިމެނޭ އެންމެހާ ފަރާތްތަކުގެ ޕާސްޕޯޓު މިހާރު ހިފަހައްޓާފައިވާ ކަމަށެވެ.