މިހިނގާ 2025 ވަނަ އަހަރުގެ ޖުލައި 26 ވަނަ ދުވަހު ހުވަދުއަތޮޅުގެ އިތުރުން ފުވައްމުލަކު ސިޓީގެ ޓީމްތަކަށް އަމާޒުކޮށްގެން ދެޖިންސަށް ހާއްސަ ވޮލީ މުބާރާތެއް ބޭއްވުމަށް ގެމަނަފުށީ ކައުންސިލުން ނިންމައި އިއުލާންކޮށްފިއެވެ.
މުބާރާތް ފެށުމަށް ހަމަޖެހިފައިވަނީ ޖުލައި 26 ގައެވެ. އަދި ޖޫން 1 ގެ ކުރިން ބައިވެރިވާން ބޭނުންވާ ޓީމްތަކަށް ވަނީ ފުރުސަތު ހުޅުވާލާފައެވެ.
އަދި މުބާރާތުގެ ބައިވެރިވުމުގެ ފީގެ ގޮތުގައި 2000 ރުފިޔާ ނެގުމަށް ވަނީ ހަމަޖެހިފައެވެ.
މުބާރާތުގެ ޗެމްޕިއަން ޓީމްއަށް 50000 ރުފިޔާގެ ފައިސާގެ އިނާމެއް ދިނުމަށް ނިންމާފައިވާއިރު ރަނަރަޕް ޓީމަށް 25000 ރުފިޔާގެ ފައިސާގެ އިނާމެއް ވަނީ ހުށައަޅާފައެވެ.
މުބާރާތް ކުޅުމަށް ހަމަޖެހިފައިވަނީ ގެމަނަފުށި ރަސްމީ ވޮލީކޯޓުގައެވެ. މި މުބާރާތަށް ތައްޔާރުވުމަށް ގެމަނަފުށި ކައުންސިލުންދަނީ ގިނަ މަސައްކަތްތަކެއް ކުރަމުންނެވެ.
ވޮލީކޯޓު ޒަމާނީ ފެންވަރަށް ތަރައްގީ ކުރުމާއިއެކު މި ބޭއްވޭ މުބާރާތަކީ ދެކުނުގައި ބޭއްވޭ އެންމެ ފޯރިގަދަ މުބާރާތަށް ވާނެކަމަށް ގިނަބަޔަކު ގަބޫލުކުރެއެވެ.
ހާއްސަކޮށް ގެމަނަފުއްޓަކީ ވޮލީގެ ހާއްސަ ރަށަކަށްވެފައި ސަރަހައްދުގައި ބޭއްވޭ ގިނަ މުބާރާތްތަކުން އެރަށުގެ ޓީމްތައްދަނީ ރަނގަޅު ކާމިޔާބީތަކެއް ހޯދަމުންނެވެ.