އެއްވެސް ކަމެއްގައި ހުރަހެއް ނޯންނާނެ، އިންސާފު ގާއިމް ކުރުމުގައި އެއްވެސް މީހެއް މުހިންމެއް ނޫން ކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފައިން ވިދާޅުވީ ރަސްމީ ދަތުރުފުޅެއްގައި މެލޭޝިޔާއަށް ފުރާ ވަޑައިގަތުމުގެ ކުރިން ދައުލަތުގެ މީޑިއާއަށް ދެއްވި އިންޓަވިއުއެއްގައެވެ.
ވަނީ މިމަހުގެ 18 ވަނަ ދުވަހު ހ. ފެންޓަނޯއީ ގެއާއި އިންވެގެން ހުރި ގޭގެ ފުރާޅު މައްޗަށް ހައްވާ ޔުމްނު ރަޝީދު ވެއްޓުނު ހާދިސާ އާއި ގުޅޭގޮތުންވެސް ވާހަކަފުޅު ދައްކަވާފައެވެ.
ރައީސް ވިދާޅުވީ ކޮންމެ ކަމެއްގައިވެސް ބޭނުންވަނީ އިންސާފު ޤާއިމުކުރުމަށް ކަމަށާއި، މިސަރުކާރަކީ އަބަދުވެސް އިންސާފުގެ މަގުން ކަންކަން ކުރުމަށް ބާރުއަޅާ ސަރުކާރެއް ކަމަށާއި އެއްވެސް ރައްޔިތަކާ މެދު ތަފާތު ނުކުރައްވާނެކަމަށެވެ.
އިންސާފުގެ ކުރިމަތީގައި އެއްވެސް މީހަކީ އެމަނިކުފާނަށް މުހިންމު މީހެއް ނޫން ކަމަށާއި، ތުހުމަތުކުރެވޭ ވަކި ކަމެއް ފޮރުވަން އުޅޭކަމަށް، ޒުވާން ކުދިންގެ ޝަކުވާތަކާއި ކަންބޮޑުވުންތައް އެބަހުރި ކަމުގައި އެބަހުރި ކަމަށާއި، އެމަނިކުފާނު ބޭނުންވަނީ ކުށްކުރި ފަރާތްތައް ހޯދައި، އެއީ ކޮންމެ ފަރާތެއްވިޔަސް ޤާނޫނުގެ ތެރެއިން އަދަބު ދިނުމަށް ކަމަށް ރައީސް ވަނީ ވިދާޅުވެފައެވެ.
ރައީސްގެ ވާހަކަފުޅުގައި އަންހެން ކުއްޖާ ވެއްޓުނު ހާދިސާއާ ބެހޭ ކަންކަން ތަޙުޤީޤުކުރުމަށް އުފައްދަވާފައިވާ ކޮމިޝަނަށްވެސް ވަނީ އަލިއަޅުވާލައްވާފައެވެ. އެ ގޮތުން އެ މައްސަލަ ތަޙުޤީޤުކުރުމަށް ބޭނުންވާ ފުރިހަމަ ބާރުވެރިކަން އެ ކޮމިޝަނަށް ދެއްވާފައިވާނެކަމަށް ވެސް ރައީސް ވިދާޅުވިއެވެ.