ހުޅުމާލެ ދެވަނަ ފިޔަވަހީގައި ހުންނަ ހިޔާ 13 ވަނަ ޓަވަރުގެ ހުރިހާ އެޕާޓްމެންޓަކުން މިއަދު 30 މިނެޓަށް ކަރަންޓުގެ ޚިދުމަތް މެދުކެނޑުމަކީ އެކަށީގެންވާ ކަމެއް ސްޓެލްކޯއިން ބުނެފިއެވެ.
ސްޓެލްކޯއިން އެކްސްގައި ކުރި ޕޯސްޓެއްގައި ބުނީ ހިޔާ ޓަވަރުތަކުގައި އެ ކުންފުނިން ކުރަންޖެހޭ މުހިންމު މަސައްކަތްތައް ބަހާލައިގެން ކުރުމަށް ތާވަލުކުރެވިފައިވާ ކަމަށެވެ. އެގޮތުން ހިޔާގެ 13 ވަނަ ޓަވަރުގައި މި މަސައްކަތް ކުރުމަށް ހަމަޖެހިފައިވަނީ މިއަދު، 27 އެޕްރީލް 2025 ވާ އާދީއްތަ ދުވަހު ކަމަށެވެ.
ސްޓެލްކޯއިން ބުނީ މިއަދު ހެނދުނު 9:00 އިން ހަވީރު 17:00 އާ ދެމެދު، އެ ޓަވަރުން ކަރަންޓުގެ ޚިދުމަތް މެދުކެނޑުމަކީ އެކަށީގެންވާ ކަމެކެވެ.
މި މަސައްކަތަކީ ހިޔާ ޓަވަރުތަކުގެ ކަރަންޓުގެ ޚިދުމަތް އިތުރަށް ހަރުދަނާކުރުމަށް ކުރެވޭ މަސައްކަތެކެވެ. ސްޓެލްކޯއިން ވަނީ މި މަސައްކަތުގެ ސަބަބުން ދިމާވެދާނެ އުނދަގޫތަކަށް މަޢާފަށް އެދިފައިވެއެވެ.