ހުޅުމާލޭ ސެންޓްރަލް ޕާކުގައި ކުރިއަށްދާ ބިލްޑް އެކްސްޕޯ 2025ގައި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ ސްޓޯލުން އެ ކުންފުނީގައި މިވަގުތު އޮތް ވަޒީފާގެ ފުރުސަތުތަކާއި އެހެނިހެން މުހިންމު މަޢުލޫމާތުތައް ހާމަކޮށްފިއެވެ.
އިކޮނޮމިކް މިނިސްޓަރ މުޙައްމަދު ސައީދު މި މަހުގެ 24 ވަނަ ދުވަހު ރަސްމީކޮށް ފައްޓަވައިދެއްވި މި އެކްސްޕޯގައި، އާރްޑީސީން މިހާރު ކުރިއަށްގެންދާ މަޝްރޫޢުތަކުގެ މަޢުލޫމާތާއި، އެ ކުންފުނިން އުފައްދާ އުފެއްދުންތަކުގެ މަޢުލޫމާތު ވެސް ދެމުން ގެންދެއެވެ.
އާރްޑީސީގެ ސްޓޯލުން ދޭ މަޢުލޫމާތުގެ ތެރޭގައި، ސްކޫލް ނިންމާ ކުދިންނަށް ހުރި އިންޓާންޝިޕް ފުރުސަތުތަކާއި، “ބިނާވެށި” ޕްރޮގްރާމާ ގުޅޭ މަޢުލޫމާތުވެސް ހިމެނެއެވެ. މި ޕްރޮގްރާމްތައް ކުރިއަށްދާނީ އެކި އުމުރުފުރާތަކަށް އަމާޒުކޮށްގެން ކަމަށް އާރްޑީސީން މަޢުލޫމާތު ދީފައިވެއެވެ.
މީގެއިތުރުން، އެ ކުންފުނިން އުފައްދާ ގައު އަދި ފެން ހިންދުމަށް ބޭނުންކުރާ ޕަމްޕުތަކުގެ މަޢުލޫމާތާއި، ރިސޯޓުތަކަށް ބޭނުންވާ އުފެއްދުންތަކުގެ މަޢުލޫމާތުވެސް އެ ސްޓޯލުން ލިބެން ހުންނާނެއެވެ.
ރާއްޖެއާއި ރާއްޖެއިން ބޭރުގެ 60 އެގްޒިބިޓަރުން ބައިވެރިވާ މި އެކްސްޕޯގައި، އިންޑިއާ، ސްރީލަންކާ، ތައިލެންޑް އަދި ޗައިނާގެ ކުންފުނިތައް ހިމެނެއެވެ. ހަތަރު ދުވަހުގެ މުއްދަތަށް ބޭއްވޭ މި އެކްސްޕޯ ކޮންމެ ދުވަހަކު ހަވީރު 4:00 އިން 6:00 އަށް އަދި ރޭގަނޑު 8:00 އިން 10:00 އަށް ހުޅުވިފައި ހުންނާނެއެވެ.