ހޮލީވުޑްގެ މަޝްހޫރު ފިލްމީ ތަރި، ބްރެޑް ޕިޓް ތިން ވަނަ ކައިވެންޏެއް ކުރުމަށް ތައްޔާރުވަމުން އަންނަ ކަމަށް މީޑިއާތަކުން ރިޕޯޓްކުރަން ފަށައިފިއެވެ.
އުމުރުން 61 އަހަރު ފަންނާނާއި އޭނާގެ ލޯބިވެރިޔާ، މަޝްހޫރު ގަހަނާ ބްރޭންޑް، އަނީތާ ކޯގެ ނައިބު ރައީސާ، އުމުރުން 32 އަހަރުގެ އިނެސް ޑި ރަމޮން، ރައްޓެހިވެގެން އުޅޭތާ 2 އަހަރުވެފައިވާ އިރު، ދެމީހުންވެސް ކައިވެންޏަށް ތައްޔާރުވަމުން އަންނަ ކަމަށާއި މާ ގިނަ ދުވަސްތަކެއް ނުވެ، އެ ކައިވެނި ކުރުމުގެ ފުރުސަތު ބޮޑު ކަމަށް މީޑިއާތަކުން ރިޕޯޓްކޮށްފައިވެއެވެ.
އިނެސް އަކީ “ވެމްޕަަޔާސް ޑައިރީ” ގެ ތަރިި ޕައުލް ވެސްލީގެ ކުރީގެ އަންހެނުންނެވެ. މި ދެމީހުންގެ 4 އަހަރުގެ ކައިވެނި ރަސްމީކޮށް ރޫޅުނީ މިދިޔަ އަހަރުއެވެ.
ބްރެޑް ޕިޓް އަކީވެސް ކުރިން އިތުރު 2 ކައިވެންޏެއްކޮށް، ވަރިވެފައިވާ، 6 ކުދިންގެ ބައްޕައެކެވެ. އޭނަ ފުރަތަމަ ކައިވެނިކުރީ “ފްރެންޑްސް” ގެ ބަތަލާ ޖެނިފާ އެނިސްޓަނާ އެވެ. 2000 ވަނަ އަހަރު ކުރި ކައިވެނި ރޫޅައިލީ 2005 ގަ އެވެ. އެއަށްފަހު އޭނާ ކައިވެނި ކުރީ ބަތަލާ އެންޖެލީނާ ޖޯލީއާ އާއިއެވެ. މި ކައިވެނި ކުރީ 2014 ގައެވެ. 6 ކުދިން މި ކައިވެންޏަށް ލިބިފައި ވަނިކޮށް މި ކައިވެނި ރޫޅުނީ 2019 ގައެވެ.