މަސްވެރިންނަށް އަންނަ މޭ މަހުގެ އެއް ވަނަ ދުވަހުން ފެށިގެން ލޯނާއި ފައިނޭންސިން ދޫކުރުމަށް ފިޝަރީޒް މިނިސްޓްރީން ބޭންކް އޮފް މޯލްޑިވްސްއާއި އެކު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކުރައްވާފައިވަނީ މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަޙްމަދު ޝިޔާމް އާއި ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފުއެވެ.
މި އެއްބަސްވުމުގެ ސަބަބުން ނެޝަނަލް ފިޝަރމަންސް ރެޖިސްޓަރީގައި ރަޖިސްޓަރީ ކޮށްފައިވާ މަސްވެރިންނަށް އެމީހުންގެ އާމްދަނީއަށް ބަލައި، އަމިއްލަ ފައިނޭންސިންގ، ކްރެޑިޓް ކާޑު އަދި ގެދޮރު ލޯނު ފަދަ އެކި ބާވަތުގެ ކްރެޑިޓް ފެސިލިޓީތައް ލިބުމަށް މަގު ފަހިވެގެންދާނެއެވެ.
އަދި ޝަރުތު ހަމަވާ މަސްވެރިންނަށް އިކުއިޓީއެއް ބޭނުންނުވެ 300,000 ރުފިޔާއާ ހަމައަށް އަމިއްލަ ފައިނޭންސިންގ ލިބޭނެއެވެ. އަދި ފުރަތަމަ ފަހަރަށް، މޫސުމާއެކު މަސްވެރިކަމުގެ އާމްދަނީއަށް އަންނަ ބަދަލުތަކަށް ބަލައި، ލޯނު ދެއްކުމުގެ ތާވަލު އެކުލަވާލެވޭނެ ކަމަށް ބީއެމްއެލް އިން ވަނީ ބުނެފައެވެ.
މަސްވެރިންނަށް ބޭންކު ލޯނު ލިބޭނެ މަގުފަހި ކުރުމަކީ ރައީސްގެ ވައުދެކެވެ.