އިސްލާމީ އުންމަތް ތަރުބިއްޔަތު ކުރުމަށް އިންޓަނޭޝަނަލް އިސްލާމިކް ޔުނިވާސިޓީ އޮފް މެލޭޝިއާ (އައިއައިޔޫއެމް) އިން ކުރަމުން އަންނަ މަސައްކަތް ފާހަގަކޮށް، އެ މަސައްކަތަށް ރައީސް ޑރ. މުހައްމަދު މުއިއްޒު މިއަދު ޝުކުރު ދަންނަވައިފިއެވެ.
ރައީސް މުއިއްޒު މިފަދައިން ވިދާޅުވެފައިވަނީ އެމަނިކުފާނަށް އޮނަރަރީ ޑޮކްޓްރޭޓް އެރުވުމަށް އައިއައިޔޫއެމްގައި ބޭއްވި ހާއްސަ ރަސްމިއްޔާތުގައެވެ. މި ރަސްމިއްޔާތުގައި އެ ޔުނިވަސިޓީގެ ކޮންސްޓިޓިއުޝަނަލް ހެޑް ޓުންކޫ އަޒީޒާ އައިމިނާ ވަނީ ރައީސަށް ޑޮކްޓާ އޮފް ފިލޯސަފީގެ އިސްލާމިކް ލީޑަޝިޕް އެންޑް މަދަނީ ޑިވެލޮޕްމަންޓްގެ ދާއިރާއިން އޮނަރަރީ ޑޮކްޓްރޭޓް އަރުވާފައެވެ.
މިއީ ރާއްޖޭގެ ތާރީޚުގައި އައިއައިޔޫއެމްއިން ދިވެއްސަކަށް އެރުވި ފުރަތަމަ އޮނަރަރީ ޑޮކްޓްރޭޓްގެ ޝަރަފެވެ. އަދި މިއީ ރާއްޖޭގެ ރައީސަކަށް ވެސް އެރުވި މިފަދަ ފުރަތަމަ ޝަރަފެވެ.
ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، “އަޅުގަނޑުމެންގެ ލޮބުވެތި އިސްލާމީ އުންމަތުގެ ފަހުރުވެރި ޖީލުތައް ތަރުބިއްޔަތު ކުރުމުގައި ޔުނިވާސިޓީން ކުރަމުން ގެންދާ ސާބިތު މަސައްކަތަށް ވަރަށް އިހުލާސްތެރިކަމާއެކު ޝުކުރު ދަންނަވަން” ކަމަށެވެ.
އައިއައިޔޫއެމްއަކީ ދިވެހި ދަރިވަރުންނާ ގާތް ގުޅުމެއް އޮންނަ ޔުނިވާސިޓީއެއްކަން ފާހަގަކުރައްވައި، ރާއްޖޭގައި ހުންނަ އިސްލާމީ ޔުނިވާސިޓީ އޮފް މޯލްޑިވްސް (އައިޔޫއެމް)ގެ ކުރިއެރުމަށް އައިއައިޔޫއެމްގެ ދައުރު ވަރަށް ފުރިހަމައަށް އަދާކުރެވިދާނެ ކަމަށް ރައީސް ގަބޫލުކުރައްވާ ކަމަށް ވިދާޅުވިއެވެ.
އިސްލާމީ ސަގާފަތަކީ ޒަމާނުއްސުރެ، ބަޣްދާދުގެ ލައިބްރަރީން ފެށިގެން، ގާހިރާގެ މެޑިކަލް ސްކޫލްތަކުން، ސަމަރްކަންދުގެ އޮބްޒަވޭޓަރީތަކުން، އަންދަލޫސިއާގެ އާކިޓެކްޗުއަލް ވޮންޑާސްތަކާ ހަމައަށް އިލްމު ހޯދުމާއި ކުރިއެރުމުގެ އަލިކަން ޒަމާނުއްސުރެ ދެމިއޮތް ސަގާފަތެއްކަން ރައީސް ފާހަގަކުރެއްވިއެވެ.