މާމިގިލީ ރައްޔިތުންނަށް ދެވޭ ޞިއްޙީ ޚިދުމަތްތައް އިތުރަށް ފުޅާކޮށް، ރަނގަޅު ފެންވަރެއްގައި ދެމެހެއްޓުމަށްޓަކައި މާމިގިލީ ޞިއްޙީ މަރުކަޒަށް އެކްސްރޭ މެޝިނެއް ގެންގޮސްފިއެވެ. މި މެޝިން ގެންދިއުމާ ގުޅިގެން ރަށުގެ އެންމެހާ ރައްޔިތުންނަށް މި މުހިންމު ޚިދުމަތް ފަސޭހަކަމާއެކު ލިބިގެންދާނެ ކަމަށް ޞިއްޙީ މަރުކަޒުން މަޢުލޫމާތު ދީފައިވެއެވެ.
ޞިއްޙީ މަރުކަޒުން ހާމަކުރި ގޮތުގައި، މި އައު ޚިދުމަތް ވީއެންމެ އަވަސް ފުރުޞަތެއްގައި ފެށުމަށް މަސައްކަތްތައް ކުރިއަށްދާ ކަމަށާއި، މިއީ މާމިގިލީގެ ޞިއްޙީ ޚިދުމަތްތައް ހަރުދަނާކޮށް، ރައްޔިތުންގެ ދުޅަހެޔޮކަން އިތުރުކުރުމަށް ލިބުނު މުހިންމު ކުރިއެރުމެކެވެ.
މި މެޝިން ޞިއްޙީ މަރުކަޒަށް ގެނައުމުގައި މާމިގިލީ އާރްޑީސީން ދެއްވި އެހީތެރިކަން ޞިއްޙީ މަރުކަޒުން ވަނީ ޚާއްޞަ ގޮތެއްގައި ފާހަގަކޮށްފައެވެ. އަދި މި މަސައްކަތުގައި އެއްބާރުލުން ދެއްވި ޞިއްޙީ މަރުކަޒުގެ މުވައްޒަފުންނާއި މާމިގިލީގެ އެންމެހައި ރައްޔިތުންގެ އެހީތެރިކަންވެސް ވަނީ ފާހަގަކޮށްފައެވެ.
މީގެއިތުރުން، މި އަގުހުރި ޚިދުމަތް ފޯރުކޮށްދިނުމަށް މަގުފަހިކޮށްދެއްވި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށާއި، ހެލްތް މިނިސްޓަރ އަލްފާޟިލް ޢަބްދުﷲ ނާޡިމްއަށާއި ވުޒާރާގެ ޓީމަށް ޞިއްޙީ މަރުކަޒުން ވަނީ ޚާއްޞަ ޝުކުރެއް އަރިސްކޮށްފައެވެ.