ފަތިސްތަރި: ފުރާވަރުގެ ކުދިން ރުޅިގަދަ ވުމާއި ރުޅިކޮންޓްރޯލު ނުވުން؛ ބެލެނިވެރިން ސަމާލުވާންވީ ބައެއް ކަންތައް!

ފުރާވަރަށް އަރާ ކުދިންގެ ރުޅިވެރިކަމަކީ ގިނަ މައިންބަފައިން ކުރިމަތިލާންޖެހޭ ބޮޑު ގޮންޖެހުމެކެވެ. ކުދިކުދި ކަންކަމުގައި ފަސޭހައިން ރުޅިއައުމާއި، އެ ރުޅި ކޮންޓްރޯލް ނުކުރެވުމަކީ ފުރާވަރުގެ ކުދިންގެ ކިބައިގައި އާންމުކޮށް ފެންނަ ސިފައެކެވެ. މިފަދަ ހާލަތްތަކުގައި މައިންބަފައިންނަށް އެޅިދާނެ ފިޔަވަޅުތަކާއި ބެހޭގޮތުން މި ލިޔުމުގައި އަލިއަޅުވާލާނަމެވެ.

ރުޅި އަންނަ ސަބަބުތައް ދެނެގަތުން; ދަރިފުޅު ރުޅި އަންނަ ސަބަބު ދެނެގަތުމަކީ އެންމެ މުހިންމު އެއް ކަމެވެ. ގިނަ ފަހަރަށް ރުޅީގެ ސިފައިގައި ފެންނަނީ ހިތުގައި ފޮރުވިފައިވާ އިހުސާސްތަކެވެ. މައިންބަފައިން ކުރަންވީ ކަމަކީ ދަރިފުޅު ރުޅި އައިސްފައި ހުންނައިރު އިތުރަށް ރުޅިގަދަ ނުކޮށް، އޭނާގެ އިހުސާސްތައް އަޑުއެހުމެވެ.

ދަރިފުޅުގެ ރުޅިވެރިކަމާ ކުރިމަތިލުމުގައި މައިންބަފައިންގެ ކެތްތެރިކަމާއި އޯގާތެރިކަމަކީ ވަރަށް މުހިންމު ދެ ސިފައެވެ….ފޮޓޯ: ހަލާލް ޕޭރެންޓިން

ހިތްހަމަޖެހޭ މާހައުލެއް ގާއިމުކުރުން؛ ދަރިފުޅާއެކު ވަގުތު ހޭދަކުރުމަކީ ވަރަށް މުހިންމު ކަމެކެވެ. މުޅި އާއިލާ އެކުގައި ކުޅިވަރު ކުޅުމާއި، ގޭތެރޭގެ މަސައްކަތްތަކުގައި ބައިވެރިވުމާއި، އެހެނިހެން މުނިފޫހިފިލުވުމުގެ ހަރަކާތްތަކުގައި ބައިވެރިވުމުން ދަރިފުޅުގެ ސްޓްރެސް ކުޑަވެ، ހިތްހަމަޖެހުން ލިބިގެންދާނެއެވެ.

ރުޅި ކޮންޓްރޯލްކުރަން ދަސްކޮށްދިނުން; ދަރިފުޅަށް ރުޅި ކޮންޓްރޯލްކުރަން ދަސްކޮށްދިނުމުގައި މައިންބަފައިންގެ ދައުރު ވަރަށް މުހިންމެވެ. މީގެ ތެރޭގައި:

ރުޅި އައުމުން ހަމަޖެހެން ވަގުތު ދިނުން
އިހުސާސްތައް ހިއްސާކުރަން ފުރުސަތު ދިނުން
ރުޅި އައި ސަބަބު ހޯދައި އެކަމާމެދު މަޝްވަރާކުރުން
ރުޅި އައުމުން ކަންތައް ކުރާނެ ރަނގަޅު ގޮތްތައް ދަސްކޮށްދިނުން

ނޭދެވޭ އަމަލުތަކުން ދުރުހެލިވުން؛ މައިންބަފައިން ވެސް ދަރިފުޅު ރުޅި އައުމުން ރުޅިއައިސް، ބަސްގަދަކޮށް، ކުއްޖާ ކުށްވެރިކުރުމުގެ ބަދަލުގައި، ކަންތައް ޙައްލުކުރެވޭނެ ރަނގަޅު ގޮތްތައް ހޯދަން މަސައްކަތްކުރަންވާނެއެވެ.

ދަރިފުޅު ރުޅިއައިސްގެން ރޮއެ ހަދާއިރު، އެކުއްޖާއަށް ބަސްކިޔައި، ކުށްވެރިކުރުމުގެ ބަދަލުގައި ހަމަޖެހެން ވަގުތު ދިނުމަކީ މުހިންމު ކަމެކެވެ. އަދި ރޮއެގެން ނަމަވެސް ހިތުގައި ހުރި އުދާސްތައް ބޭރުކުރުމުގެ ފުރުސަތު ދޭންވާނެއެވެ. ޚާއްޞަކޮށް ފުރާވަރުގެ ކުދިންނަށް އަމިއްލައަށް ވިސްނައި، އެކަހެރިވެ ހުރުމުގެ ފުރުސަތު ނުދިނުމަކީ އެކުދިންގެ ރުޅިވެރިކަމާއި ރުންކުރުކަން އިތުރުވެގެން ދިއުމުގެ މައިގަނޑު ސަބަބެކެވެ. އެހެންކަމުން، ގޯސްކަމެއް ނުކުރާހާ ހިނދަކު، ދަރިފުޅަށް އެކަހެރިވެ ހުރުމުގެ ވަގުތު ދިނުމަކީ މުހިންމު ކަމެކެވެ. ދަރިފުޅު ހަމަޖެހުމުން، އޯގާތެރިކަމާއި ލޯބިވެރިކަމާއެކު ވާހަކަދައްކައި، ވިސްނައިދިނުމަކީ އެދެވިގެންވާ ކަމެކެވެ. މިފަދައިން ޢަމަލުކުރުމުން، ދަރިފުޅުގެ އަޚްލާޤަށް އަންނަ ހެޔޮ ބަދަލު ފާހަގަކުރެވޭނެއެވެ.

ދަރިފުޅުގެ ރުޅިވެރިކަމާ ކުރިމަތިލުމުގައި މައިންބަފައިންގެ ކެތްތެރިކަމާއި އޯގާތެރިކަމަކީ ވަރަށް މުހިންމު ދެ ސިފައެވެ. ދަރިފުޅުގެ އިހުސާސްތަކަށް އިހުތިރާމްކޮށް، އޭނާއަށް ބޭނުންވާ އެހީތެރިކަން ފޯރުކޮށްދިނުމަކީ މައިންބަފައިންގެ ޒިންމާއެކެވެ. މިކަމުގައި ކެތްތެރިވެ، ދެމެހެއްޓެނިވި ގޮތެއްގައި މަސައްކަތްކުރުމުން، ދަރިފުޅުގެ ރުޅިވެރިކަން މަޑުމަޑުން ކުޑަވެ، އެކަމާ ކުރިމަތިލާން ދަސްވެގެންދާނެއެވެ.

ޓެގް