ދުނިޔޭގެ ފަތުރުވެރިކަމުގެ ދާއިރާގެ އެންމެ ފާހަގަކޮށްލެވޭ އެވޯޑު ޝޯ ކަމަށްވާ ވޯލްޑް ޓްރެވަލް އެވޯޑްސް 2025 ގެ ޝަރަފުވެރި ފަސް ކެޓަގަރީއަކަށް ރާއްޖޭގެ ގައުމީ އެއާލައިން، މޯލްޑިވިއަން ނޮމިނޭޓްވެއްޖެއެވެ.
މިކަން ހާމަކުރަމުން މޯލްޑިވިއަން އިން މިއަދު ބުނެފައިވަނީ މި ފަސް ކެޓަގަރީއަށް ނޮމިނޭޓްވުމަކީ އެ ކުންފުންޏަށް ލިބޭ ވަރަށް ބޮޑު ޝަރަފެއް ކަމުގައެވެ. މޯލްޑިވިއަން ނޮމިނޭޓްވެފައިވަނީ އިންޑިއަން އޯޝަންސް ލީޑިން އެއާލައިން، ލީޑިން އެއާލައިން – ބިޒްނަސް ކްލާސް، ލީޑިން އެއާލައިން – އިކޮނޮމީ ކްލާސް، ލީޑިން އެއާލައިން ބްރޭންޑް އަދި ލީޑިން ކެބިން ކްރޫ ގެ ކެޓަގަރީތަކަށެވެ.
1993 ވަނަ އަހަރުން ފެށިގެން ދެމުން އަންނަ ވޯލްޑް ޓްރެވަލް އެވޯޑްސްއަކީ ދުނިޔޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުގެ އަގު ވަޒަންކުރުމުގައި އެންމެ ފާހަގަކޮށްލެވޭ އެވޯޑު ޕްރޮގްރާމެވެ. މިދިޔަ އަހަރު ދިވެހިރާއްޖެއަށް މި އެވޯޑްސްގެ 9 ކެޓަގަރީއަކުން ވަނީ އެވޯޑް ލިބިފައެވެ.
މީގެ ތެރޭގައި “ވޯލްޑްސް ލީޑިން ޑެސްޓިނޭޝަން 2024” އަދި “ވޯލްޑްސް ލީޑިން ގްރީން ޑެސްޓިނޭޝަން” ގެ އެވޯޑު ދިވެހިރާއްޖެއަށް ލިބުނެވެ. އަދި ޓްރާންސް މޯލްޑިވިއަން އެއާވޭސް، ހުޅުލެ އައިލެންޑް ހޮޓެލް، ޖެން މޯލްޑިވްސް މާލެ، ވަކަރު މޯލްޑިވްސް އަދި ދަ ސެއިންޓް ރެޖިސް މޯލްޑިވްސް ވޮއްމުލި ރިސޯޓް ފަދަ ތަންތަނަށްވެސް އެކި ކެޓަގަރީތަކުން އެވޯޑް ލިބިފައިވެއެވެ.
މޯލްޑިވިއަން އިން ވަނީ މި އަހަރުގެ އެވޯޑަށް ވޯޓު ދިނުމަށް އާންމުންނަށް ހުޅުވާލައި، ރަޖިސްޓަރ ކުރުމަށްފަހު ވޯޓު ދިނުމަށް އެދިފައެވެ.