ރައްޔިތުންނަށް ތެދުވެރިކަމާއި މިނިވަންކަމާއެކު މަޢުލޫމާތު ފޯރުކޮށްދިނުމަށް ވަކި އަތަކަށް ނުޖެހި މަސައްކަތްކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނޫސްވެރިންނަށް އިލްތިމާސްކުރައްވައިފިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ނޫސްވެރިންނަކީ ވަރަށް މާތް މަޤްޞަދެއްގައި ވަރަށް ބޮޑު ޒިންމާއެއް އަދާކުރާ ބައެއް ކަމަށެވެ. އަދި ތެދު މަޢުލޫމާތު މިނިވަންކަމާއެކު ރައްޔިތުންނަށް ފޯރުކޮށްދިނުމަކީ ނޫސްވެރިންގެ އެންމެ ބޮޑު ޒިންމާ ކަމުގައި ފާހަގަކުރެއްވިއެވެ.
“ތިބޭފުޅުންނަށް ހަމަ ތަނަކުން ލިބޭހާ މަޢުލޫމާތެއް އެ ނުވާނެ ކޮންމެހެން ތެދަކަށް. ތެދުބަހުން ވާހަކަދެއްކުމަކީ ޗޮއިސްއެއް ނޫން، އެއީ ޒިންމާއެއް. އެއީ މަޖުބޫރު ކަމެއް ކޮންމެ މީހަކަށް ވެސް. ޚާއްސަކޮށް މުސްލިމަކަށް ވީތީ ވާހަކަދައްކަންޖެހޭނީ ތެދުބަހުން،” ރައީސް މުޢިއްޒު ވިދާޅުވިއެވެ.
ރައީސް އިތުރަށް ފާހަގަކުރެއްވި ގޮތުގައި، ބައެއް ނޫސްވެރިން ސެންސޭޝަނަލައިޒް ކުރުމަށް ނުވަތަ ގިނަ މީހުން ކިޔާ ގޮތް ހެދުމަށްޓަކައި ތެދެއް ދޮގެއް ބެލުމެއްނެތި ޚަބަރުތައް ޝާއިޢުކުރާ ކަމީ ކަންބޮޑުވާންޖެހޭ ކަމެކެވެ. އަދި ކަންކަމުގައި ވަކި ސައިޑެއް ނެގުމަކީ ވެސް ތެދު މަޢުލޫމާތު ފޯރުކޮށްދިނުމެއް ނޫން ކަމަށް އެމަނިކުފާނު ވިދާޅުވިއެވެ.
މި ބައްދަލުވުމުގައި ރައީސް މުޢިއްޒު އަމާޒުކުރެއްވީ ކޮންމެ ނޫސްވެރިއަކު ވެސް ނޫސްވެރިކަން ކުރަންވާނީ ޒިންމާދާރުކަމާއެކު ކަމަށާއި، އެއްވެސް މީހެއްގެ ނުފޫޒެއް ނެތި މިނިވަންކަމާއެކު މަސައްކަތްކުރުމުގެ މުހިންމުކަމަށެވެ.