ދުނިޔޭގެ ނޫސްވެރިކަމުގެ މިނިވަންކަމުގެ ދުވަސް ފާހަގަކުރުމުގެ ގޮތުން މިއަދު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބޭއްވެވި ނޫސްވެރިންގެ ބައްދަލުވުމަކީ ރާއްޖޭގެ ރައީސަކު މިހާތަނަށް ބޭއްވި އެންމެ ދިގު ނޫސްވެރިންގެ ބައްދަލުވުން ކަމުގައިވެ، އަދުގެ މި ފާހަގަކުރެވޭ ތާރީހުގައި ރައީސް ޑރ މުއިއްޒުގެ މި ނޫސްވެރިންގެ ބައްދަލުވުން ތާރީހުގައި ވިދުންގަދަ ކުލައަކުން ފަވާލެވިއްޖެއެވެ.
ރައީސް އޮފީހުގައި މިއަދު ހެނދުނު 10:00 ގައި ފެށުނު މި ބައްދަލުވުމުގައި 36 ނޫސްވެރިން ބައިވެރިވިއެވެ. ބައްދަލުވުން ފެށުމުގެ ކުރިން ރައީސް މުޢިއްޒު ވަނީ ސަރުކާރުން ހިންގަމުންދާ މަޝްރޫޢުތަކާއި އެކި މަސައްކަތްތަކުގެ މަޢުލޫމާތު ނޫސްވެރިންނާ ހިއްސާކުރައްވާފައެވެ.
މި ބައްދަލުވުމުގައި ކޮންމެ ނޫސްވެރިއަކަށްވެސް ދެ ބުރެއްގެ މަތިން ސުވާލުކުރުމުގެ ފުރުސަތު ދެވުނެވެ. ބައެއް ނޫސްވެރިން އަށް ސުވާލަށްވުރެ ގިނަ ސުވާލު ކުރިއެވެ. ރައީސް މުޢިއްޒު ވަނީ ނޫސްވެރިންގެ އެއްވެސް ސުވާލަކަށް ޖަވާބު ދެއްވުމަށް އިންކާރު ނުކުރައްވައި، ހުރިހާ ސުވާލުތަކަށް ޖަވާބު ދެއްވާފައެވެ.
މި ދިގު ބައްދަލުވުން މެދުކެނޑުނީ އެންމެ ދެ ފަހަރެއްގެ މަތިންނެވެ. އެއީ މެންދުރު ނަމާދާއި އަސުރު ނަމާދުގެ ވަގުތުގައި 30 މިނެޓަށެވެ. މި ބައްދަލުވުމަކީ ކުރިން އިޢުލާންކުރެވިފައިވާ ބައްދަލުވުމަކަށް ވުމާއެކު، ނޫސްވެރިންނަށް ވަނީ ސުވާލުތަކަށް ތައްޔާރުވުމުގެ ފުރުސަތު ލިބިފައެވެ. މަޣްރިބަށް މެދުކަނޑާލުމަށްފަހު ހަމަ އެންމެ ފަނަރަ ވަރަކަށް މިނެޓުފަހުން އަނެއްކާވެސް ނޫސްވެރިންގެ ބައްދަލުވުން މިހާރުވެސް އެދަނީ ކުރިއަށެވެ. އެއްވެސް ވަރުބަލިކަމެއް ނެތި އަދިވެސް ރައީސް އެވަޑައިގަންނަވަނީ ސުވާލުތަކަށް ޖަވާބު ދެއްވަމުންނެވެ.
މި ބައްދަލުވުމަކީ ރާއްޖޭގެ ނޫސްވެރިކަމުގެ ތާރީޚުގައި ފާހަގަކޮށްލެވޭ ބައްދަލުވުމެއްގެ ގޮތުގައި ރެކޯޑުކުރެވި، ރައީސް މުޢިއްޒުގެ ނަން ތާރީޚުގެ ތެރެއަށް ވަދެގެން ދިޔަ ބައްދަލުވުމެކެވެ.