ދުވަހަކުވެސް ޤާނޫނާ ޚިލާފު އެއްވެސް ކަމެއް ކުރައްވާފައި ނުވާނެ ކަމަށާއި، އަދި ކުރިއަށް އޮތްތަނުގައިވެސް ނުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި، ހައުސިންގ މިނިސްޓަރުކަމުގެ މަޤާމުގައި ހުންނެވިއިރު ނާޖާއިޒު ކަންތައްތަކެއް ހިންގެވި ކަމަށް ބުނެ ފެތުރެމުންދާ ވާހަކަތަކާ ގުޅޭގޮތުން ކުރެވުނު ސުވާލުތަކަށް ރައީސް މުޢިއްޒު ވަނީ ތަފްސީލީ ޖަވާބުތަކެއް ދެއްވާފައެވެ.
ރައީސް ވަޙީދު އަދި ރައީސް ޔާމީންގެ ސަރުކާރުގައި ހައުސިންގ މިނިސްޓަރުކަން ކުރެއްވި ރައީސް މުޢިއްޒު ވިދާޅުވި ގޮތުގައި، އެ މިނިސްޓްރީ ހިންގެވި ދުވަސްވަރު އެތައް ސަތޭކަ މުވައްޒަފުން މަސައްކަތްކުރަމުން ދިޔައެވެ. އަދި ބަޔަކު ދައްކާ ވާހަކަތަކުގައި އެއްވެސް ޙަޤީޤަތެއް އޮތްނަމަ، އެކަމުގެ ހެއްކެއް އޮންނަންޖެހޭނެ ކަމަށްވެސް އެމަނިކުފާނު ވިދާޅުވިއެވެ.
“އަޅުގަނޑެއް ދުވަހަކުވެސް ވަރަށް ކެޓަގަރިކަލީ މި ދަންނަވަނީ، ދުވަހަކުވެސް ޤާނޫނާ ޚިލާފު ކަމެއް ނުކުރަން އަދި ނުވެސް ކުރާނަން. އަޅުގަނޑެއް ދުވަހަކު ވެސް ނުފޫޒުގެ ބޭނުން ނާޖައިޒު ގޮތުގައި ނުހިފަން، ނުވެސް ހިފާނަން. އަޅުގަނޑަކީ ދުވަހަކުވެސް ކޮރަޕްޝަނުގެ ކަމެއް ކުރި މީހެއް ނޫން. ނުވެސް ކުރާނަން،” ރައީސް މުޢިއްޒު ވިދާޅުވިއެވެ.
މީގެއިތުރުން، އޭސީސީ ފަދަ މައްސަލަތައް ތަޙުޤީޤުކުރާ މުއައްސަސާތަކުން އެމަނިކުފާނާމެދު ކުރެވޭ ކޮންމެ ތުހުމަތެއް ބެލުމާމެދު މައްސަލައެއް ނެތްކަމަށް ރައީސް ވިދާޅުވިއެވެ. އަދި މިވަގުތު ރައީސުލްޖުމްހޫރިއްޔާގެ ހައިސިއްޔަތުން މުއައްސަސާތަކަށް މެންބަރުން އައްޔަނުކުރުން ފިޔަވައި އިތުރު ޒިންމާއެއް އެމަނިކުފާނުގެ ނެތްކަމަށްވެސް ވިދާޅުވެފައިވެއެވެ.