ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މިހާތަނަށް ޤައުމެއްގެ ވެރިއަކު ބޭއްވި އެންމެ ދިގު ނޫސްވެރިންގެ ބައްދަލުވުމުގެ ރެކޯޑް މުގުރާލައްވައިފި އެވެ. މެއި 3 ވަނަ ދުވަހުގެ ހެނދުނު 10 ޖެހިއިރު ފެށި ބައްދަލުވުން ނިމުނީ މެއި 4 ވަނަ ދުވަހުގެ ރޭ 12:54 ގައެވެ. މިއީ ޖުމްލަ 14 ގަޑިއިރާއި 54 މިނެޓުގެ ދިގު ބައްދަލުވުމެކެވެ.
މީގެ ކުރިން މި ރެކޯޑް އޮތީ ޔުކްރޭނުގެ ރައީސް ވޮލޮޑިމީރް ޒެލެންސްކީގެ އަތްމަތީގައެވެ. އެމަނިކުފާނު ބޭއްވި ނޫސްވެރިންގެ ބައްދަލުވުން ދެމިގެން ދިޔައީ 14 ގަޑިއިރަށެވެ. ނަމަވެސް ރައީސް މުޢިއްޒު ވަނީ އެ ރެކޯޑް 54 މިނެޓުން އިތުރުކުރައްވާފައެވެ.
ރައީސް އޮފީހުގައި ބޭއްވުނު މި ބައްދަލުވުމުގައި 36 ނޫސްވެރިން ބައިވެރިވި އެވެ. ބައްދަލުވުމުގައި ކޮންމެ ނޫސްވެރިއަކަށްވެސް ބޭނުން ކޮންމެ ސުވާލެއް ކުރުމުގެ ފުރުސަތު ދެވުނެވެ. ބައެއް ނޫސްވެރިން 20 އަށްވުރެ ގިނަ ސުވާލު ކުރިއެވެ. ނަމާދު ވަގުތުތަކަށް މެދުކަނޑާލި ނަމަވެސް، ބައްދަލުވުން ކުރިއަށް ގެންދެވުނެވެ.
ބައްދަލުވުން ދިގުލައިގެން ދިއުމާ ގުޅިގެން ބައެއް ނޫސްވެރިން ކަންބޮޑުވުން ފާޅުކުރި ނަމަވެސް، “ހުރިހާ ނޫސްވެރިންގެ ހުރިހާ ސުވާލުތަކަށް ޖަވާބު ދެއްވުމަށް ބޭނުންފުޅުވާތީ،” ކަމަށް ރައީސް ވިދާޅުވިއެވެ.
މި ބައްދަލުވުން ބޭއްވުނީ ދުނިޔޭގެ ނޫސްވެރިކަމުގެ މިނިވަންކަމުގެ ދުވަސް ކަމުގައިވާ މެއި 3 ވަނަ ދުވަހުއެވެ. ބައްދަލުވުން އޮންނާނެކަން ކުރިއާލާ އިޢުލާންކުރެއްވުމާ އެކު، ނޫސްވެރިންނަށް ސުވާލުތަކަށް ތައްޔާރުވުމުގެ ފުރުސަތު ލިބުނެވެ.