ރާއްޖޭގެ ވެރިކަން ހިންގުމާއި ރައްޔިތުންނަށް ޚިދުމަތް ފޯރުކޮށްދިނުން ޑިޖިޓައިޒްކުރުމަށް ސަރުކާރުން ފަށާފައިވާ “ދިވެހިރާއްޖެ 2.0” މަޝްރޫޢަކީ ރައްޔިތުންގެ މެދުގައި ދައުލަތުގެ މުއައްސަސާތަކަށް އިތުބާރު އިއާދަކޮށްދޭނެ މަޝްރޫޢެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ރައީސް މުޢިއްޒު ވިދާޅުވި ގޮތުގައި، މި މަޝްރޫޢަކީ ޑިޖިޓަލް ފަސްޓް ނުވަތަ ޑިޖިޓަލް ޙައްލުތަކަށް އެންމެ މަތީ އިސްކަމެއް ދޭ ދިވެހިރާއްޖެއެއް، ކޮންމެ ރައްޔިތަކަށާއި، ކޮންމެ ރަށަކަށާއި، އަދި އަންނަން އޮތް ހުރިހާ ޖީލުތަކަށް ޓަކައި ޤާއިމުކުރުމަށް ސަރުކާރުން ގެންގުޅޭ ކުރިމަގުގެ ތަޞައްވުރެކެވެ.
މަޝްރޫޢުގެ އަށް ތަނބު
ދިވެހިރާއްޖެ 2.0 މަޝްރޫޢު ބިނާވެފައިވަނީ އަށް މައިގަނޑު ތަނބެއްގެ މައްޗަށެވެ. މީގެ ތެރޭގައި ޑިޖިޓަލް އައިޑެންޓިޓީއާއި އިތުބާރުކުރެވޭ މުޢާމަލާތްތައް، ހާމަކަން ބޮޑު މަޢުލޫމާތު ހިއްސާކުރުމާއި ސަރުކާރު ހިންގުން، އަދި ޤައުމީ ވިލުންވެރިކަމަށް ސައިބަރ ސެކިއުރިޓީ ހިމެނެއެވެ.
މީގެ އިތުރުން، ޒަމާނީ ޤާނޫނީ އޮނިގަނޑެއް ޤާއިމުކުރުމާއި، ރައްކާތެރި ދައުލަތުގެ ޑިޖިޓަލް ބިންގާ އެޅުމާއި، ރައްޔިތުންގެ ނާރެހުގައި އެނބުރޭ އީ-ސަރުކާރުގެ ޚިދުމަތްތައް ތަޢާރަފުކުރުން ހިމެނެއެވެ. އަދި ވަކިވަކި ދާއިރާތަކަށް ޑިޖިޓަލް އިންޤިލާބެއް ގެނައުމާއި، އައިސީޓީ ތަރައްޤީކުރުމާއި އީޖާދުތައް ކުރިއެރުވުން ވެސް މި މަޝްރޫޢުގެ މުހިންމު ބައިތަކެއްގެ ގޮތުގައި ހިމެނެއެވެ.
މި މަޝްރޫޢުގެ ސަބަބުން ދިވެހި ހުނަރުވެރިން ބާރުވެރިކޮށް، އައު ވިޔަފާރިތަކަށް ފުރުޞަތުތައް ހުޅުވި، ޑިޖިޓަލް ސިނާޢަތްތައް ރާއްޖޭގެ މުސްތަޤުބަލުގެ އިޤްތިޞާދު ބައްޓަންކުރުމަށް މަގުފަހިވެގެންދާނެ ކަމަށް ރައީސް މުޢިއްޒު ފާހަގަކުރެއްވިއެވެ.