މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން އެ ކުންފުނީގެ މަސްކިރުމުގެ އޮޕަރޭޝަންތަކުގައި ބޭނުންކުރަމުން އައި "ރަންދި 27" ވިއްކާލުމަށް އަލުން އިޢުލާންކޮށްފިއެވެ.
މިފްކޯއިން މިއަދު ނެރުނު އިޢުލާނުގައި ބުނެފައިވާ ގޮތުގައި، މިދިޔަ އަހަރުގެ ނޮވެމްބަރު 25 ވަނަ ދުވަހު މި ބޯޓު ވިއްކާލުމަށް ކުރި އިޢުލާނަށް އެއްވެސް ފަރާތަކުން ޝައުޤުވެރިކަން ފާޅުކޮށްފައި ނުވުމާ ގުޅިގެން، އެ އިޢުލާނު ބާޠިލުކުރުމަށްފަހު، މިހާރު ވަނީ ސިޓީލާ ނީލަމުގެ އުސޫލުން ވިއްކާލުމަށް ނިންމާފައެވެ. މި ބޯޓު ވިއްކާލުމަށް ހަމަޖެހިފައިވަނީ 400,000 ރުފިޔާގެ ފެށޭ އަގެއްގައެވެ.
"ރަންދި 27" އަކީ 2018 ވަނަ އަހަރުގެ އޮކްޓޯބަރު މަހުން ފެށިގެން މިފްކޯގެ އޮޕަރޭޝަންތަކުގައި ބޭނުންކުރަމުން އައި، ފައިބަރުން ބަނދެފައިވާ 50 މެޓްރިކް ޓަނުގެ ބޯޓެކެވެ. ނަމަވެސް މިދިޔަ އަހަރުގެ ޖެނުއަރީ 5 ވަނަ ދުވަހުން ފެށިގެން މި ބޯޓުގެ އޮޕަރޭޝަންތައް ވަނީ ހުއްޓާލާފައެވެ. މިހާރު މި ބޯޓު ބަނދަރުކޮށްފައި ވަނީ ފެލިވަރުގައެވެ.
މިފްކޯގެ ސީނިއަރ މެނޭޖަރެއް ކަމަށްވާ އަޙްމަދު ޝަރީފް މި ނޫހަށް ވިދާޅުވި ގޮތުގައި، މި ބޯޓު ވިއްކާލުމަށް ނިންމާފައިވަނީ ބޯޓުގެ އިންޖީނު ހަލާކުވެ، އަދި އެހެނިހެން ވަސީލަތްތައްވެސް މަރާމާތުކުރަން ޖެހިފައިވާތީއެވެ. "މިފްކޯއިން ވަނީ މިދިޔަ އަހަރުތަކުގައި އެ ކުންފުނީގެ އޮޕަރޭޝަންތަކުގައި ބޭނުންކުރުމަށް އާ ބޯޓުތަކެއް ގެނެސްފައި. މީގެ ތެރޭގައި ދުވާލަކު 60 ޓަނުގެ މަސް ގަނޑުކުރެވޭ އަދި 200 ޓަނުގެ މަސް ރައްކާކުރެވޭ ޒަމާނީ ބޯޓުތައް ހިމެނޭ،" އަޙްމަދު ޝަރީފް ވިދާޅުވިއެވެ.
މި ބޯޓު ގަތުމަށް ޝައުޤުވެރިވާ ފަރާތްތަކުން މިފްކޯގެ ވެބްސައިޓުން ލިބެންހުރި ބިޑް ފޯމު ފުރިހަމަކޮށް، 30 އޭޕްރިލް 2024 ވާ އާދީއްތަ ދުވަހުގެ 14:00 ގެ ކުރިން ހުށަހެޅުމަށް އިޢުލާނުގައި ބަޔާންކޮށްފައިވެއެވެ. މި ބޯޓާ ގުޅޭ އިތުރު މަޢުލޫމާތު ހޯދުމަށް ޝައުޤުވެރިވާ ފަރާތްތަކަށް މިފްކޯގެ ފެލިވަރު އޮފީހާ ގުޅައިގެން އެ މަޢުލޫމާތު ސާފުކުރެވޭނެ ކަމަށްވެސް އިޢުލާނުގައި ބުނެފައިވެއެވެ.