އިޤްތިޞާދީ ބަދަލުތަކާއިއެކު، އިސްލާމިކް ފައިނޭންސްގެ ދާއިރާއިން ކުރިއަރާފައިވާ ޤައުމަކަށް ރާއްޖެ ހެދުމަކީ ސަރުކާރުގެ އަމާޒު ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިފަދައިން އެމަނިކުފާނު ވިދާޅުވީ މިއަދު މޯލްޑިވްސް އިސްލާމިކް ސޯޝަލް ފައިނޭންސް އިނީޝިއޭޓިވް (މިސްފީ) އިފްތިތާޙްކުރެއްވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.
ރައީސް މުޢިއްޒު ވިދާޅުވި ގޮތުގައި މިސްފީއާއެކު، މާލީ ދާއިރާއާއި މަދަނީ ޖަމްޢިއްޔާތަކާ ދެމެދު ގުޅުން ބަދަހިވެ، މުޖުތަމަޢުގައި ތިބި އެހީއަށް ބޭނުންވާ ފަރާތްތަކަށް އެހީތެރިވެވޭނެ ހަރުދަނާ ނިޒާމެއް ޤާއިމުކުރެވިގެންދާނެއެވެ. އަދި މިކަން ހަޤީޤަތަކަށް ހެދުމަށްޓަކައި ޤާނޫނުތަކާއި ގަވާއިދުތަކަށް ގެންނަންޖެހޭ ބަދަލުތައް ގެނައުމަށް ސަރުކާރުން ތައްޔާރަށް އޮތްކަމަށްވެސް އެމަނިކުފާނު ވިދާޅުވިއެވެ.
“ޤައުމެއްގެ ތަރައްޤީ ހަމައެކަނި މިންކުރެވެނީ އެޤައުމެއްގެ އިޤްތިޞާދީ ކުރިއެރުމުން ނޫން. އެއީ އަބުރުވެރިކަމާއި، އިޙްތިރާމާއެކު މުޖުތަމަޢުގައި އުޅުމުގެ ފުރުސަތު އެންމެނަށް ފަހިކޮށްދެވިގެން ޙާސިލުވާ އަމާޒެއްކަން ޤަބޫލުކުރަންޖެހޭ،” ރައީސް މުޢިއްޒު ވިދާޅުވިއެވެ.
މި އިނީޝިއޭޓިވްގެ މައިގަނޑު ލަނޑުދަނޑިތަކުގެ ތެރޭގައި މުޖުތަމަޢުގައި ތިބި އެހީތެރިކަން ބޭނުންވާ ފަރާތްތަކަށް އެހީވުމާއި، އިންސާފު ޤާއިމުކުރުމާއި، އިޖުތިމާޢީ ހަމަހަމަކަން ޤާއިމުކުރުން ހިމެނެއެވެ. މީގެ އިތުރުން، ޞަދަޤާތާއި، ވަޤުފް އަދި އިސްލާމިކް ކްރައުޑް ފަންޑިންގ މެދުވެރިކޮށް، އިސްލާމިކް ބޭންކިންގ ނިޒާމުގެ ތެރެއިން މުޖުތަމަޢުގެ ނާޒުކު ފަރާތްތައް މާލީގޮތުން ބާރުވެރިކުރެވި، އިޖުތިމާޢީ އަދާލަތު ޤާއިމުކުރެވިގެންދާނެކަމަށް ރައީސް ފާހަގަކުރެއްވިއެވެ.
ރައީސް މުޢިއްޒު އިތުރަށް ވިދާޅުވި ގޮތުގައި މޯލްޑިވްސް ފައިނޭންސް އިނިޝިއޭޓިވްއަކީ މާލީ ކަންކަމުގައި އެހެން ފަރާތްތަކުގެ ބައިވެރިވުން އިތުރުކޮށް، ޤައުމީ ތަރައްޤީގެ ޕްލޭންގައި ހިމެނޭ މުހިއްމު ލަނޑުދަނޑިތައް ހާސިލްކުރުމަށްވެސް މަގުފަހިކޮށްދޭނެ މުހިއްމު މަސައްކަތެކެވެ.